Еуропалық дипломатияның басшысы Кая Калластың айтуынша, бұл – «Ресейге қарсы осы күнге дейін қабылданған ең қатаң санкциялар пакеттерінің бірі». Каллас Еуропа Украинаны қолдаудан бас тартпайтынын және Ресей соғысты тоқтатпайынша, оған қысымды күшейтетінін мәлімдеді.
ЕО-ның Ресейге қарсы 18-ші санкциялар пакеті G7 елдері үшін шикі мұнайдың бағасын барреліне шамамен 47,6 долларға дейін төмендетуді қамтиды. Сонымен қатар, санкциялар «Солтүстік ағын-1» және «Солтүстік ағын-2» газ құбырларына қатысты мәмілелерге жаңа тыйымды да қарастырады, деп хабарлады Reuters белгісіз дат дипломатына сілтеме жасап.
Кешкісін Словакия премьер-министрі Роберт Фицо ел өкілдеріне ЕО-да 18-ші санкциялар пакетін қолдауды тапсырғанын мәлімдеді. Ол өзінің бейнеүндеуінде Еуропалық комиссия төрайымы Урсула фон дер Ляйенмен Словакияға газ бағасына қатысты кепілдіктер беру туралы келісімге келгенін айтты. Оның айтуынша, санкцияларды әрі қарай бұғаттау «тиімсіз қадам» болар еді. Бұған дейін 18-ші санкцияларды қабылдауға жалғыз кедергі Словакияның вето құқығы болатын. Оған дейін Братислава ЕО бастамасын алты рет бұғаттаған еді.