Астанада өтіп жатқан дәстүрлі Тамыз конференциясында қозғалған тақырыптар мен жағымды жаңалықтар туралы бұрынғы Оқу-ағарту министрі, қазіргі Мәжіліс депутаты Асхат Аймағамбетов Facebook парақшасында бөлісті, деп хабарлайды Arasha.kz.
Депутаттың айтуынша, Мемлекет басшысы мұғалімдердің құқықтарын қорғау мәселесіне тағы да ерекше назар аударып, прокуратураға жергілікті биліктің 2019 жылдан бері қолданыстағы заңды бұзу фактілерін тоқтатуды тапсырды.
"Дәстүрлі тамыз кеңесінде Мемлекет басшысы мұғалімдердің құқықтарын қорғаудың маңыздылығына тағы да ерекше тоқталып, прокуратураға жергілікті билік 2019 жылдан бері қолданыстағы, педагогтарды өздеріне тән емес жұмыстардан босататын және олардың құқықтарын қорғайтын заң нормаларын бұзған жағдайларды тоқтатуды тапсырды.
Аймақтардағы өрескел мысалдар – жазда мұғалімдерді су қоймаларының қасында кезекшілікке қою, мектеп бітіру кештері өткен мейрамханаларда кезекшілікке шығару немесе қалалық шыршаларды безендіруге жіберу– бұл заңды тікелей бұзу болып табылады. Әдеттегідей, Мемлекет басшысы педагогтардың қорғаны болды", – деді депутат.
Аймағамбетов ата-аналар мен мектеп арасындағы жауапкершілік шекарасын нақты айқындау қажеттігін атап өтті.
"Бөлек айтатын мәселе – педагогтардың, мектептің және ата-аналардың жауапкершілігін нақты ажырату. Бірнеше жыл бұрын біз арнайы заңға мектеп пен ата-ана арасында әр тараптың құқықтары мен міндеттері нақты көрсетілетін шарт жасау нормасын енгіздік. Алайда барлық мектептер бұл тетікті тиімді пайдаланып отырған жоқ, соның салдарынан көбіне «кінәлі» етіп мектепті шығарады.
Шын мәнінде, егер жасөспірім сабақтан тыс уақытта құқық бұзушылық жасаса, директорды немесе сынып жетекшісін жұмыстан босату – биыл бірқатар өңірде орын алғанындай– әділетсіз ғана емес, сонымен бірге заңсыз да. Дәл осы себепті біз бұл қағидатты одан да нақтырақ бекіту үшін біз арнайы түзетулер дайындадық: мектеп тек өз құзыретіне кіретін мәселелерге ғана жауап беруі керек, сабақтан тыс уақытта болған оқиғаларға емес.
Президент әрқашан педагогтар мен мектептерге толық қолдау көрсетіп, әділетті ұстанымды талап етеді: педагог өзіне қатысы жоқ оқиғалар үшін жауап бермеуі тиіс. Бүгін Мемлекет басшысы осы мәселе бойынша нақты тапсырма берді. Бұл – тек әділет мәселесі ғана емес, сонымен бірге мұғалімнің мотивациясын, беделін және ел дамуын сақтау мәселесі.
Айтпақшы, былтыр біз, депутаттар, мұғалімдердің құқықтарын бұзғаны үшін жауапкершілікті күшейту жөнінде Әкімшілік құқық бұзушылық туралы кодекске түзетулер енгізген едік. Ол кезде қорытындыда бұл нормаларымыщ қолдау таппады. Бірақ бүгін Президенттің тапсырмасынан кейін мұндай өзгерістер қабылданатынына сенімдімін", – деді Асхат Аймағамбетов.
Депутаттың сөзінше, директорды немесе сынып жетекшісін сабақ уақытына қатысы жоқ оқиға үшін жұмыстан босату – әділетсіз әрі заңсыз. Осыны нақтылау үшін арнайы түзетулер дайындалған: мектеп тек өз құзыретіне кіретін жағдайлар үшін ғана жауап береді.
Аймағамбетов Президенттің бұл бағыттағы ұстанымын әділетті деп бағалап, педагогтарға әрдайым толық қолдау көрсетіп келе жатқанын айтты. Сондай-ақ ол былтыр мұғалімдердің құқықтарын бұзғаны үшін жауапкершілікті күшейтуге арналған Әкімшілік кодекс түзетулері қабылданбай қалғанын, бірақ Мемлекет басшысының жаңа тапсырмасынан кейін олардың қабылданатынына сенімді екенін жеткізді.