2025 жылдың шілде айында «Шұбаркөл Премиум» АҚ-ның теміржол көлігімен көмір тасымалдау көлемі 416 мың тоннаны құрап, кәсіпорын тарихындағы ең жоғары көрсеткішке жетті.
7 айдың қорытындысы бойынша жалпы жөнелтілген көмірдің көлемі 1,3 млн тоннаны құрады. Оның ішінде: Қызылжар станциясынан – 244 мың тонна, Шұбаркөл станциясынан – 1 млн тоннадан астам.
«Компания акционерлерінің стратегиялық басқаруы мен дәйекті инвестицияларының арқасында биыл бірқатар маңызды өзгеріске қол жеткізілді: өндіріс жаңғыртылды, жаңа жабдық сатып алынды, жаңа теміржол желісінің құрылысы жүргізіліп, заманауи теміржолдық өлшеу жүйесі орнатылып жатыр. Бұл шаралар кәсіпорынға өнім сапасын айтарлықтай арттырумен қатар, дамудың жаңа кезеңіне шығуға мүмкіндік берді. 2025 жылы кәсіпорын 3 миллион тоннадан астам көмір өндіруді жоспарлап отыр», – деп атап өтті «Шұбаркөл Премиум» АҚ баспасөз қызметі.
Кәсіпорын өнімі ішкі және сыртқы нарықта жоғары сұранысқа ие. Бүгінде «Шұбаркөл Премиум» – қызметін қайта жандандырумен шектелмей, Қазақстанның көмір саласындағы табысты трансформация мен ілгерілеудің символына айналған, қарқынды өсіп келе жатқан кәсіпорын.
Компания тұтынушылардың әртүрлі сегменттердегі қажеттіліктітолық қанағаттандырып, өнімді нақты сұраныстарға сәйкес ұсынады. Бұдан бөлек, «Шұбаркөл Премиум» сапаға селективті тәсілдемені қолдана отырып, тапсырыс берушілердің ең күрделі талаптарына да сай келетін ұсыныстарды қалыптастыра алады. Кәсіпорынның ашық саясаты көптеген серіктесті қызықтырып, оларға өндірушімен тікелей жұмыс істеу мүмкіндігін берді.