АҚШ президенті Дональд Трамп АҚШ, Ресей және Украина арасындағы бейбіт реттеу жөніндегі үшжақты кездесу өтетініне сенеді. Алайда Ресей мен Украина президенттерінің екіжақты кездесуінің болашағына күмәнмен қарайды, деп хабарлайды Arasha.kz.
«Үшжақты кездесу өтеді. Екіжақтысын — білмеймін, бірақ үшжақтысы болады. Кейде адамдар оған дайын болмайды ғой», — деді АҚШ президенті Дональд Трамп Daily Caller басылымына берген сұхбатында.
АҚШ президенті Ресей мен Украина туралы айта келе, тағы да балалардың ойын алаңындағы жанжалына ұқсатты. Ол бұл салыстыруды бұрын да бірнеше рет жасаған.
«Бір бала және екінші бала ойын алаңында, олар бір-бірін жек көреді, қолдарын сермей бастайды, сермей береді, сіз олардың тоқтағанын қалайсыз, бірақ олар жалғастыра береді. Біраз уақыттан кейін олар өздері де тоқтауға қуанышты болады, түсінесіз бе? Бұл шамамен сондай нәрсе. Кейде оларды тоқтатпас бұрын сәл айқасуы қажет. Бірақ бұл ұзаққа созылып кетті. Көптеген адамдар қаза тапты», — деді Трамп.
Трамп Ақ үйге қайта оралып, президенттік креслодағы алғашқы 24 сағат ішінде Украинадағы соғысты тоқтатуға уәде берген болатын. Алайда кейінірек ол бейбіт келісімге қол жеткізу оңай емес екенін бірнеше рет мойындады.