Мәскеу Еуропаның бейбітшілік архитектурасын қатыгез түрде қиратты, сондықтан алдымызда бірнеше онжылдыққа жарайтын жаңа қауіпсіздік жүйесін құру міндеті тұр. Бұл туралы Германия канцлері Фридрих Мерц мәлімдеді, деп хабарлайды Arasha.kz.
Оның айтуынша, Ресей президенті Владимир Путиннің «империалистік жоспары» Украинаны жаулап алумен аяқталмайды, бұл «тек бастамасы ғана». «Біз күн сайын және барған сайын күшейіп келе жатқан ресейлік гибридтік шабуылдарға, соның ішінде инфрақұрылымымызға қарсы әрекеттерге тап болып отырмыз», – деді ол 8 қыркүйек, дүйсенбі күні Берлиндегі Сыртқы істер министрлігінде өткен неміс елшілерінің төрт күндік конференциясының ашылуында.
Канцлер сонымен қатар «Мәскеудің Солтүстік және Балтық теңіздеріндегі арандатушылықтарына» және Киевке жасалған Ресей соққысына назар аударды, деп жазды DW. Бұл шабуыл салдарынан ЕО өкілдігінің ғимараты зақымданған. Бұл Мәскеудің «ережелерге негізделген тәртіпті, Еуропаның бейбітшілік архитектурасын қатыгездікпен бұзғанының» айғағы екенін айтты.
Оның сөзінше, Германияның алдында «бірнеше онжылдыққа жарайтын жаңа қауіпсіздік архитектурасын құруға» бағытталған «тарихи міндеттер» тұр. «Біз либералды дүниежүзілік тәртіп деп атайтын құндылық көптеген тараптан, соның ішінде Батыстың өз ішінен де қысымға ұшырауда», – деп түсіндірді Мерц. Ол «либералды демократиялар мен автократиялар арасындағы жаңа қақтығыс» басталғанын айтты.
ФРГ басшысы алдағы жылдары Германияның АҚШ және Қытаймен қарым-қатынасы елеулі түрде өзгереді деп сендірді.
«АҚШ өз мүдделерін қайта қарауда, және бұл соңғы күндері басталған жоқ. Сондықтан біз де Еуропада өз мүдделерімізді қайта қарастыруымыз қажет, жалған ностальгияға берілмей. Дегенмен, АҚШ маңызды серіктес болып қала береді, еуропалықтар олармен тығыз ынтымақтастық пен үйлесімділікті жалғастырады», – деді ол.