Дамаск судьясы Тауфик әл-Алидің айтуынша, бұл шешім 2011 жылы Дараа қаласындағы бейбіт шерулерді басуға байланысты қабылданған, деп хабарлайды Arasha.kz.
Асадқа қасақана кісі өлтіру, адамдардың өліміне әкелген азаптаулар, заңсыз бостандықтан айыру айыптары тағылып отыр. Құжатта сондай-ақ «азаматтық соғысты тұтандыруға әрекет жасау» сияқты басқа да айыптар көрсетілген.
Сот қаулысы Сирия билігіне Интерполға халықаралық тергеу бастау туралы жүгінуге мүмкіндік береді.
Істерді Дараада басталған және Сирия көтерілісіне түрткі болған наразылық құрбандарының отбасылары қозғаған.
2024 жылғы 8 желтоқсанда елде 2011 жылдан бері жалғасқан азаматтық соғыста шешуші бетбұрыс болды. 24 жыл бойы билікті ұстап келген Башар Асад режимі құлады. Көтерілісшілер Дамаскты басып алып, Асад Ресейге қашты.
Қаңтарда Сирияда Ахмед әш-Шараа жетекшілік ететін өтпелі әкімшілік құрылды. Жаңа билік экс-президентті экстрадициялауды талап етті, алайда Мәскеу оны беруден бас тартты.