2025 жылдың қыркүйек айында қазақстандықтар шетелге 71,6 млрд теңге сомасында 149,3 мың халықаралық ақша аударымы (ХААЖ) жіберді, деп хабарлайды Arasha.kz.
Бұл тамыз айымен салыстырғанда аударым санының 5,1%-ға өскенін, ал жалпы көлемнің 1,6%-ға азайғанын көрсетеді.
Шетелге аударымдар географиясы
Қазақстаннан ең көп қаржы аударылған мемлекеттердің қатарында дәстүрлі түрде Өзбекстан, Ресей және Түркия бар.
Өзбекстанға — 25,0 млрд теңге (барлық аударым көлемінің 34,9%-ы),
Ресейге — 20,3 млрд теңге (28,4%),
Түркияға — 11,3 млрд теңге (15,8%),
Грузияға — 4,2 млрд теңге (5,8%),
Қырғызстанға — 2,4 млрд теңге (3,4%).
Бұл елдерге жасалған аударымдар жалпы соманың 88 пайызынан астамын құрайды.
Аударым жүйелерінің үлесі
Шетелге ақша жөнелтуде «Золотая Корона» жүйесі негізгі көшбасшы болып отыр — барлық операциялардың 84 пайыздан астамы осы жүйе арқылы жүргізілген. Одан кейін Western Union (10,9%), MoneyGram (2,5%) және UPT (1,8%) жүйелері келеді.
Валюта құрылымы
Халықаралық аударымдардың көп бөлігі қазақстандық теңгемен жасалған — олардың жалпы санындағы үлесі 69,9%, ал көлемі бойынша 55,8%.
АҚШ доллары арқылы жасалған аударымдар санының үлесі 16,3%, ал сомасы бойынша 34,6%.
Ресей рублі мен еуроның үлесі тиісінше 13,6% және 0,2% шамасында.
Шетелден келген ақша аударымдары
Қыркүйек айында Қазақстан азаматтары шетелден 20,4 млрд теңге көлемінде 48 мың ақша аударымын қабылдады. Бұл көрсеткіш тамыз айымен салыстырғанда сәл төмен — аударым саны 0,8%-ға, ал көлемі 2%-ға азайған.
Негізгі елдер
Қазақстанға ең көп қаражат аударылған елдер мыналар:
Ресей – 4,7 млрд теңге (23%),
АҚШ – 3,0 млрд теңге (14,9%),
Өзбекстан – 2,6 млрд теңге (12,5%),
Түркия – 2,5 млрд теңге (12,4%),
Германия – 1,6 млрд теңге (8%).
Бұл бес елден келген қаражат жалпы түсімнің шамамен 70 пайызын құрап отыр.
Ақша алу жүйелері
Қазақстанға келетін аударымдардың басым бөлігі де «Золотая Корона» жүйесі арқылы жасалған – барлық түсімнің жартысына жуығы (49,2%) осы жүйеге тиесілі. Одан кейін Western Union (33,4%) және MoneyGram (15,9%) келеді.
Валюталар бойынша түсімдер
Шетелден алынған аударымдардың негізгі бөлігі АҚШ долларымен (58,3%) және қазақстандық теңгемен (19,4%) жүргізілген. Қалған бөлігі рубль (15,4%) мен еуро (6,9%) үлесіне тиесілі.