Қазақтың тұңғыш кәсіби бишісі, Қазақстанның халық әртісі Шара Жиенқұлованың бұрын еш жерде жарияланбаған сирек бейнематериалы анықталды. Бұл туралы ҚР Мәдениет және ақпарат министрлігінің баспасөз қызметі хабарлады.
Бейнежазба «Архив-2025» мемлекеттік бағдарламасы аясында Ресейдің Красногорск қаласындағы Ресей мемлекеттік кинофотоқұжаттар архивінен табылған.
Министрліктің мәліметінше, Шара Жиенқұлованың «Бипыл» халық әніне орындаған ұлттық биінің бейнежазбасы Қазақстан Республикасы Орталық мемлекеттік кино-фотоқұжаттар мен дыбыс жазбалары архивінде сақталған. Сараптама барысында видеоматериалдың 1958 жылғы 21 желтоқсанда өткен Қазақ әдебиеті мен өнерінің онкүндігінің қорытынды концертінде түсірілгені анықталған.
Аталған онкүндік - қазақ халқының әдебиеті мен өнерін бүкіл Кеңес Одағына танытқан алғашқы ірі мәдени шаралардың бірі. Сондай-ақ 1934 жылы Шара Жиенқұлова М. Әуезовтің «Айман - Шолпан» спектаклінде алғаш рет қазақтың «Келіншек» биін орындап, ұлттық би өнерінің дамуына жол ашқан еді.