Президент Қасым-Жомарт Тоқаев "Зияткерлік меншік мәселелеріне қатысты Қазақстан Республикасының кейбір заңнамалық актілеріне өзгерістер мен толықтырулар енгізу туралы" заңға қол қойды, деп хабарлайды Arasha.kz.
Құжаттың негізгі мақсаты – зияткерлік меншік құқықтарын қорғауды күшейту және осы саладағы бірқатар процестерді жетілдіру. Жаңа заң бірнеше маңызды жаңашылдықты қамтиды.
Заңда қарастырылған негізгі өзгерістер:
- Көру қабілеті бұзылған азаматтарға жеңілдік. Енді олар автордың рұқсатынсыз және сыйақы төлемей-ақ жарияланған туындыларды көпшілікке қолжетімді етіп орындай алады, тарата алады және пайдалана алады.
- Тауар белгілерін тіркеуді жеделдету. Бұрын тіркеу рәсімі 7 айға созылатын. Жаңа заң ақылы жедел тіркеу механизмін енгізіп, бұл мерзімді 4 айға дейін қысқартуға мүмкіндік береді. Бұл кәсіпкерлердің өнімдерін нарыққа тез шығаруы үшін қолайлы жағдай жасайды.
- Шағымдану мерзімі ұлғайтылды. Тауар белгісін тіркеуге қатысты шағымды бұрын 1 ай ішінде беруге болатын. Жаңа заң бұл мерзімді 2 айға дейін ұзартуды көздейді.
- Авторлық құқықты қорғауды күшейту. Авторлар мен құқық иелерінің шағымдары бойынша Әділет органдары жоспардан тыс тексерулер жүргізе алады. Бұл заңсыз контентті пайдалануға қарсы тиімді бақылау орнатуға бағытталған.
- Ұжымдық құқықтарды басқарудың цифрлық жүйесі. Салада бірыңғай цифрлық платформа енгізіліп, авторлық құқықтарды басқару үрдісі бір орталықтан автоматтандырылмақ.