Оңтүстік Корея өнерінің ең биік тұлғаларының бірі, елге «халық атасы» атанған Ли Сун Джэ 91 жасында өмірден өтті. Актердің қазасы сейсенбі күні таңертең белгілі болды. Отбасы бұл мәліметті растағанымен, өлім себебіне қатысты нақты ақпарат таратылған жоқ.
Ли Сун Джэ - корей сахнасы мен телеэкранның символына айналған, жетпіс жылға жуық уақыт бойы үздіксіз еңбек еткен аңыз адам. Ол 1950-жылдары театрдан бастаған, кейін теледидар мен кинода жүздеген рөл сомдап, әр буынның ойын, сезімін, мінезін танытқан дара шебер ретінде танылды. Тіпті 90 жасында да сахнаға шығып, көрерменнің қошеметінен айырылмаған.
Соңғы жылдары денсаулығы сыр бергені белгілі. Бір жыл бұрын жоспарланған спектакльге қатысуын тоқтатуға мәжбүр болған. Дегенмен ол өмірінің соңына дейін өнерден толық қол үзбеді, шәкірт тәрбиелеп, мәдениет саласында пікір айтып, елдің рухани өміріне араласып жүрді.
Ли Сун Джэ корей қоғамында ерекше құрметке ие болды көпшілік оны «теледидардағы әке» деп атайтын. Жылы жүзі, сабырлы кейпі, көпшілікке жақын мінезі арқылы ол экраннан ғана емес, халықтың жүрегінен де орын тапқан.
91 жылдық ғұмыр бір ғана адамның өмірі емес, бүтін бір дәуірдің тарихы. Оның өнері Кореядағы мәдени өзгерістерді, қоғамдағы құбылыстарды, көрермен талғамының эволюциясын өзіне сыйғызды. Сол себепті Ли Сун Джэ-нің қазасы - тек бір актердің дүниеден өтуі емес, тұтас мәдени кезеңнің жабылуы.
Корея бұған дейін де үлкен тұлғаларынан айырылған, бірақ бұл жолғы жоғалту халықтың жадында ұзақ сақталары анық. Ли Сун Джэ-нің аты енді корей өнерінің алтын қорында мәңгі қалмақ.