20 шілдеде Жаңа адамдардың Antitrash азаматтық науқаны жариялаған әшкерелеу нәтижесінде Тұран мен Ұлы Дала көшелерінің қиылысында орналасқан 8,6 гектарлық заңсыз қоқыс үйіндісі үшін «Нұр Астана Құрылыс» құрылыс компаниясы жауапты екені анықталды, деп хабарлайды Arasha.kz.
Екі ай бойы белсенділер рейдтер жүргізіп, жүк көліктерінің қозғалысын бақылап, жүргізушілермен сөйлесті және жергілікті тұрғындардың шағымдарын зерттеді. Мониторинг нәтижесі бойынша, аумақты басты ластаушысы «Нұр Астана Құрылыс» компаниясы екені анықталды: олардың құрылыс және тұрмыстық қалдықтары күн өткен сайын артып, аумақты заңсыз қоқыс алаңына айналдырған.
Белсенділер аумақтан жиналған қоқысты компания кеңсесіне курьерлік жеткізу түрінде қайтарып: «Егер мәселені елемесе, ол тікелей қайтарылады» деген жолдау жасады. Акция қоғамда үлкен резонанс тудырып, БАҚ және әлеуметтік желілерде кең талқыланды.
«NAK» кеңсесінде холдинг директоры Серікжан Мұхтаров қоқыс үйіндісі үш ай ішінде толық жойылатынын мәлімдеді. Бүгін алғашқы нәтижелер байқалады: жазда құрылыс қалдықтарына толы болған аумақ тазартылған. Десек те, бейнеайғақтарға қарамастан, «Нұр Астана Құрылыс» компаниясы «өздеріне тиесілі емес» қоқысты жинап жатқанын айтады, ал бейнежазбада қалдықтарды оларға тиесілі жүк көліктер әкеліп, төгіп жатқаны анық көрінеді.
Қоқыс алаңының басым бөлігі жойылды, бірақ қалдықтар бөлігі әлі де толық тазартуды талап етеді. «NAK» өз міндеттемелерін орындады, алайда Antitrash азаматтық науқаны жұмысты жалғастырудың маңыздылығын атап өтеді. Белсенділер қоқыс үйіндісі толықтай жойылғанға дейін бақылауды жалғастырып, компанияны жауапкершілікті ұмытпауға және жұмысты соңына дейін жеткізуге шақырады.
«Бұл кейс — азаматтық белсенділік қаланы өзгерте алатынының айқын мысалы. Біз үшін нәтиже көрсету маңызды: қоғамдық бақылау тек сынау болғанда емес, жетістіктің адал есебі болғанда тиімді. Адамдар олардың назар аударуы мен қатысуы шынайы өзгерістерге әкелетінін және әрбір адамның еңбегі маңызды екенін көруі керек», - дейді Сұлтан Жұмағалиев.