Қазақстанда жаңа Салық кодексі күшіне енді, деп хабарлайды Arasha.kz.
«Осы Кодекс салық салудың негізгі қағидаттарын белгілейді, салықтар мен бюджетке төленетін басқа да міндетті төлемдерді белгілеу, енгізу, өзгерту, жою, есептеу және төлеу тәртібі бойынша биліктік қатынастарды, сондай-ақ салық міндеттемесін орындауға байланысты қоғамдық қатынастарды реттейді», – делінген 2025 жылғы 18 шілдеде қабылданып, бейсенбі күні күшіне енген Салық кодексінде.
ҚазТАГ қолданыстағы Салық кодексінің редакциясынан халық пен бизнес үшін, объективті бағалаулар бойынша, ең сезімтал саналатын негізгі параметрлерді келтірді. Аталған нормалар азаматтардың табысына және жұмыс берушілердің шығындарына тікелей әсер етеді немесе компаниялар мен кәсіпкерлердің салық жүктемесін елеулі түрде қалыптастырады.
Бизнес пен жұмыс берушілер үшін негізгі параметрлер:
• ҚҚС-тың стандартты мөлшерлемесі – 16% (айналымдар мен импортқа)
• Медицина саласы үшін ҚҚС-тың жеңілдетілген мөлшерлемелері:
2026 жылдан бастап – 5%
2027 жылдан бастап – 10% (дәрі-дәрмектер, медициналық бұйымдар, медициналық қызметтер)
• Отандық баспа өнімдеріне ҚҚС – 10%
• Еңбекақы қоры (жалақы) бойынша бірыңғай төлем:
2026 жыл – 24,8%
2027 жыл – 25,8%
2028 жыл – 26,3% (оның құрамына ЖТС, зейнетақы жарналары, әлеуметтік аударымдар, МӘМС кіреді)
• Корпоративтік табыс салығы (КТС) – объектілер мен қызмет түрлері бойынша:
төлем көзінен салынатын табыстар – 15%
резидент емес тұлғалардың таза табысы (тұрақты мекеме арқылы) – 15%
КИК / КИК-тің тұрақты мекемесінің табыстары – 20%
• Қызмет түрлері бойынша КТС-тың төмендетілген мөлшерлемелері:
ауыл шаруашылығы тауарын өндірушілер – 3%
ауыл шаруашылығы кооперативтері – 6%
әлеуметтік сала – 5% (2026 жыл), 10% (2027 жылдан бастап)
Аталған параметрлер қызметкерлер мен үй шаруашылықтарының нақты табыстарын айқындайды, бизнес үшін еңбек құнын қалыптастырады (бірыңғай төлем мен әлеуметтік аударымдар арқылы), тауарлар мен қызметтердің бағасына тікелей әсер етеді (ҚҚС), салалар арасындағы бәсекелестік ортаны белгілейді (КТС мөлшерлемелерін саралау), сондай-ақ жеке кәсіпкерлер мен шағын бизнестің салық жүктемесіне ықпал етеді (прогрессивті мөлшерлемелер).