Венесуэланың Ішкі істер министрі Диосдадо Кабельо ел президенті Николас Мадуроны қолға түсіру бойынша АҚШ жүргізген операция салдарынан қаза тапқандар мен жараланғандар туралы мәліметті нақтылады, деп хабарлайды Arasha.kz.
«Қазіргі уақытта, мен дәл қазіргі сәтті айтып отырмын, 100 адам қаза тапты. Шамамен дәл сондай мөлшерде адам жараланды», - деп хабарлады Кабельо, оның сөзін CNN келтірді.
Оның айтуынша, қаза болғандардың «қақтығысқа ешқандай қатысы болмаған».
«Өз үйлерінде болған бейбіт тұрғындар, әйелдер елімізге тасталған қуатты бомбалардан зардап шекті», - деп түсіндірді министр.
Қаза тапқан бейбіт тұрғындардың нақты саны айтылған жоқ.
Дегенмен, бұған дейін The Guardian басылымы жазғандай, Венесуэла армиясы қаза тапқан 23 әскери қызметшінің тізімін жариялаған болатын. Басылым сәрсенбі күні Венесуэлада АҚШ операциясы кезінде қаза тапқан бірнеше сарбазды жерлеу рәсімі өткенін нақтылады.
Дүйсенбі күні Куба үкіметі Мадуроны ұстау операциясы кезінде Венесуэлада 32 кубалықтың қаза тапқанын хабарлады. АҚШ Мемлекеттік хатшысы Марко Рубио NBC News телеарнасының эфирінде Мадуроны кубалықтар күзеткенін мәлімдеді.
Өз кезегінде АҚШ президенті Дональд Трамп операция барысында бірде-бір америкалық әскери қызметші қаза таппағанын, бірақ кейбірі жараланғанын айтты.
Өткен аптаның соңында америкалық әскерилер Каракаста Венесуэла президенті Николас Мадуроны қолға түсіріп, АҚШ-қа алып кеткен болатын. АҚШ билігі Мадуроны есірткі саудасына қатысы бар деп айыптап отыр.