10 қаңтарда Нобель комитеті Нобель Бейбітшілік сыйлығы лауреаты мәртебесінің өзгермейтіндігі туралы мәлімдеме жасады, деп хабарлайды Arasha.kz.
Трамп пен Мачадо арасындағы марапат төңірегіндегі ашық белсенділік 5 қаңтарда АҚШ президенті Мария Корина Мачадоны Венесуэла көшбасшысы ретінде қолдамайтынын айтқаннан кейін басталды.
Осыдан кейін, 6 қаңтарда Fox News телеарнасына берген сұхбатында Мачадо бұл марапатты АҚШ президенті Дональд Трампқа беруге немесе онымен бөлісуге дайын екенін мәлімдеген болатын.
«Біздің Нобель Бейбітшілік сыйлығын алғанымызды білгенде, мен оны Дональд Трампқа арнадым, өйткені ол бұған лайықты деп есептедім... Егер мен қазан айында оны лайықты деп санасам, қазір бұл сенімімнің қаншалықты нығая түскенін елестетіп көріңіз», — деді Мачадо.
Жүргізушінің «Нобельді» Трампқа беру туралы ұсыныс жасадыңыз ба?» деген сұрағына саясаткер былай деп жауап берді:
«Бұл әзірге болған жоқ. Бірақ мен оған жеке өзім барып, біз, Венесуэла халқы, бұл марапатты оған бергіміз келетінін және онымен бөліскіміз келетінін айтқым келеді».
9 қаңтарда АҚШ президенті Дональд Трамп Венесуэла оппозициясының көшбасшыларының бірі әрі Нобель сыйлығының лауреаты Мария Корина Мачадоның елді саяси басқару ісіне тартылуы мүмкін екенін жоққа шығармады.
«Мен онымен сөйлесуім керек. Сөйлесемін. Ол осы істің қандай да бір аспектісіне тартылуы мүмкін. Маған онымен тілдесу қажет болады», — деп мәлімдеді Трамп.
Тіпті келер аптада Вашингтонда саясаткерлердің кездесуі жоспарланған болатын. Бірақ Трамптың мәлімдемесінен бірнеше сағат өткен соң, Нобель комитеті өз сайтында Нобель Бейбітшілік сыйлығы лауреаты мәртебесінің өзгермейтіндігі туралы пресс-релиз жариялады.
«Фактілер айқын және нақты бекітілген. Нобель сыйлығы берілгені туралы хабарланғаннан кейін оны кері қайтарып алуға, бөлуге немесе басқа тұлғаларға беруге болмайды. Шешім түпкілікті және тұрақты күшінде қалады», — делінген комитет мәлімдемесінде.
10 қаңтарда Трамп егер американдық мұнай компаниялары Венесуэланың мұнай инфрақұрылымын қалпына келтіруге инвестиция сала бастаса, оларға «толық қауіпсіздік пен қорғау» берілетінін мәлімдеді. Сөз кем дегенде 100 миллиард долларлық жеке инвестициялар туралы болып отыр.