Армения премьер-министрі Никол Пашинян ел әскерінің құрылғанына 34 жыл толуына орай мәлімдеме жасап, «соғыс болмайды» деп сендірді. Оның айтуынша, екі ел арасында орнаған бейбітшілік — қауіпсіздіктің ең басты кепілі, деп хабарлайды Arasha.kz.
Пашинянның мәлімдемесінен басты ойлар:
Қару-жарақ мәселесі: Бұған дейін халықаралық серіктестер Арменияға қару сатудан бас тартып келген. Себебі олар бұл техниканың «Армения аумағынан тыс жерге шығарылуынан» немесе Ұжымдық қауіпсіздік туралы шарт ұйымының (ҰҚШҰ) қолына түсуінен қауіптенген.
Премьер-министр ҰҚШҰ-дағы әріптестерін сынға алды. Оның айтуынша, ұйым Арменияның аумақтық тұтастығын қорғаудан бас тартқан және Ереван алдын ала ақшасын төлеп қойған миллиондаған долларлық қару-жарақты жеткізбеген.
Пашинян бұл тығырықтан шығудың екі жолын атады: 2022 жылғы Прага декларациясы аясында Әзірбайжанның аумақтық тұтастығын мойындау және ҰҚШҰ-ға мүшелікті тоқтату.
Ереван бұдан былай өз әскерін тек ел ішінде және халықаралық бітімгершілік миссияларында ғана қолданбақ.
Ресей тарапы (С. Лавров, М. Захарова) Арменияның ұйымнан шығуының заңды негізі жоқ екенін және Ереван әлі де толыққанды мүше болып қала беретінін бірнеше рет мәлімдеді. Ал РФ Президенті Владимир Путин 2025 жылғы 27 желтоқсандағы Бішкек саммитінен кейін бұл шешімді Арменияның «егемен таңдауы» деп атап, Ереванның әзірге тек жиналыстарға қатысудан тартынып отырғанын атап өтті.