Ирандағы Бушер АЭС-і станция маңындағы жарылыстарға байланысты жұмысын тоқтатты, «Росатом» қызметкерлердің бір бөлігін эвакуациялауда, деп хабарлайды Arasha.kz.
Станция жұмысының тоқтатылғаны туралы «Росатом» басшысы Алексей Лихачев мәлімдеді. Ол сөз Бушерде салынған және ресейлік мемлекеттік корпорация қызмет көрсететін алғашқы ирандық атом электр станциясы туралы болып отырғанын нақтылады.
«Станцияға («Бушер») қауіп төніп тұрғаны анық, өйткені станцияның физикалық қорғаныс шебінен бірнеше шақырым жерде жарылыстар естілуде. Олар станцияға бағытталмаған, сол маңда орналасқан әскери нысандарға бағытталған, бірақ қауіптің артып жатқаны байқалады», - деді ол.
Лихачевтің айтуынша, қазіргі уақытта АЭС-те 639 ресейлік қызметкер бар. Ол «Росатом» аймаққа жасалған шабуылдар арасындағы үзілістерге байланысты 150–200 қызметкерді алып шығуды жоспарлап отырғанын айтты.