Жаңаөзенде қызды күштеп тұрмысқа бермек болған бес ер адамға қатысты сот үкімі шықты, деп хабарлайды Lada.kz сайтына сілтеме жасап Arasha.kz.
Іс бойынша олар алдын ала сөз байласып, қызды күш қолдану арқылы алып кеткені анықталған. Сот айыпталушыларды кінәлі деп танып, әрқайсысына үш жыл бас бостандығынан айыру жазасын тағайындады.
Облыстық соттың мәліметінше, оқиға өткен жылдың 16 желтоқсанында болған. Бес азамат бірлесіп, қызды оның еркінен тыс алып кетіп, некеге тұруға мәжбүрлемек болған.
Сот үкіміне сәйкес Айыпталушылар Қазақстан Республикасы Қылмыстық кодексінің 125-1-бабы 2-бөлігінің 1 және 4-тармақтары бойынша (алдын ала сөз байласқан адамдар тобының күш қолдану арқылы некеге мәжбүрлеуі) кінәлі деп танылды. Сот шешімімен олардың әрқайсысы үш жыл мерзімге бас бостандығынан айырылды.
Заң бойынша мұндай қылмыс үшін айыппұлдан бастап 10 жылға дейін бас бостандығынан айыру жазасы қарастырылған.