Иранның Азаматтық авиация басқармасы 18 сәуір таңынан бастап елдің әуе кеңістігі ішінара ашылғанын мәлімдеді. Бұл туралы бірқатар БАҚ, соның ішінде Tasnim агенттігі хабарлаған, деп жазады Arasha.kz.
Мәліметке сәйкес, сенбі күні жергілікті уақытпен таңғы сағат 07:00-ден бастап елдің әуе кеңістігінің бір бөлігі қайта ашылған. Мұндай шешім Ұлттық азаматтық-әскери үйлестіру комитетінде жағдайды талқылағаннан кейін, ұшу қауіпсіздігі талаптарын ескере отырып қабылданған.
"Осыған сәйкес, сондай-ақ ұшқыштарға арналған ресми хабарлама (NOTAM) негізінде 18 сәуір күні таңғы сағат 07:00-ден бастап елдің әуе кеңістігі мен бірқатар әуежайлар ашылды", – делінген басқарма мәлімдемесінде.
Сондай-ақ әуежайлардың жұмысы әскери және азаматтық қызметтердің дайындығына қарай кезең-кезеңімен қалпына келтірілетіні хабарланды.