Ұлттық бірыңғай тестілеуде қажетті балл жинай алмау жоғары білім алу мүмкіндігі толық жоғалды деген сөз емес. Қазақстанда мұндай жағдайда талапкерлер үшін бірнеше балама жол қарастырылған, деп хабарлайды Arasha.kz, Liter.kz-ке сілтеме қалдырып.
Жыл сайын мыңдаған түлек ҰБТ нәтижесін тағатсыздана күтеді. Алайда кейбір талапкерлер шекті балдан өте алмайды немесе мемлекеттік грантқа жететін ұпай жинай алмай жатады. Мамандардың айтуынша, бұл - болашаққа қойылған нүкте емес.
ҰБТ-ны қайта тапсыруға болады
Егер талапкер шекті балл жинай алмаса, тестілеуді қайта тапсыру мүмкіндігі бар. Қазақстанда жыл ішінде бірнеше ҰБТ кезеңі өтеді. Бірақ негізгі грант конкурсына қатысу үшін негізгі тестілеуге қатысу міндетті. Кейінгі мүмкіндіктер көбіне ақылы бөлімге түсуге жол ашады.
Ақылы бөлімге түсу
Кей жағдайда грантқа жетпеген талапкер жоғары оқу орнына ақылы негізде оқуға түсе алады. Егер студент оқу барысында жақсы нәтиже көрсетсе, кейін бос гранттарға ауысуға мүмкіндік беріледі.
Бір жыл дайындалып, қайта тапсыру
Егер армандаған мамандық жоғары балл талап етсе, бір жыл дайындыққа арнауға болады. Осы уақыт ішінде білімді толықтырып, келесі жылы нәтижені жақсартуға мүмкіндік бар.
Колледжге түсу
Тағы бір тиімді жол - колледжге оқу. Колледж бітіргеннен кейін кей мамандықтар бойынша университетте қысқартылған бағдарлама арқылы білімді жалғастыруға болады.
Басқа мамандық немесе университет таңдау
Барлық мамандықтар жоғары ұпай талап ете бермейді. Сондықтан басқа бағыттарды немесе конкурс деңгейі төмен оқу орындарын қарастыруға болады. Бұл бір жыл жоғалтпауға көмектеседі.
Шетелде оқу мүмкіндігін қарастыру
Кейбір шетелдік университеттер ҰБТ нәтижесін талап етпейді. Олар аттестат бағасы немесе өздерінің ішкі емтихандары арқылы қабылдайды. Сондықтан шетелде білім алу да балама нұсқалардың бірі саналады.
Мамандардың айтуынша, бір сынақтан төмен нәтиже көрсету өмірлік мақсаттан бас тарту дегенді білдірмейді. Ең маңыздысы - асығыс шешім қабылдамай, барлық мүмкіндікті саралап шығу.