Ұлытау облыстық мәслихатының аппараты облыс әкімі лауазымына жаңа кандидатураны келісу үшін депутаттардың жиналысы өтетінін хабарлады, деп хабарлайды Arasha.kz, Zakon.kz-ке сілтеме жасап.
Облыстық мәслихат жариялаған хабарламаға сәйкес, Қазақстан Республикасы Президентінің 2022 жылғы 8 маусымдағы №912 Жарлығына сәйкес Ұлытау облысы аумағындағы барлық деңгейдегі мәслихат депутаттарының жиналысы 2026 жылғы 17 шілде күні сағат 11:00-де Жезқазған қаласында өтеді. Жиын барысында облыс әкімі қызметіне ұсынылған кандидатқа келісім беру мәселесі қаралады.
Депутаттарды тіркеу таңғы сағат 10:00-де басталады.
Қазіргі уақытта Ұлытау облысының әкімі қызметін Дастан Рыспеков атқарады. Ол бұл лауазымға 2024 жылғы 9 қазанда тағайындалған болатын.
Дастан Рыспеков 1984 жылы Қарағанды облысында дүниеге келген. Әл-Фараби атындағы Қазақ ұлттық университеті мен ҚазГЗУ жанындағы Алматы заң академиясын тәмамдаған.
Еңбек жолын 2006 жылы Алматы қаласының Экономика және бюджеттік жоспарлау департаментінде бас маман қызметінен бастаған. Кейін осы салада және республикалық бюджеттің атқарылуын бақылау органдарында түрлі басшылық қызметтерді атқарды.
2016-2018 жылдары «Астана ЭКСПО-2017» ұлттық компаниясында бухгалтерлік есеп және есептілік департаментінің директоры - бас бухгалтер болды. 2018-2019 жылдары Павлодар облысының кәсіпкерлік, сауда және туризм басқармасын басқарды.
2019 жылдан бастап қайтадан «Астана ЭКСПО-2017» ұлттық компаниясында экономика және бюджеттік жоспарлау департаментінің директоры қызметін атқарды. 2020-2023 жылдары Мәдениет және спорт министрлігінің Туризм индустриясы комитетінің төрағасы болды.
2023 жылдың тамыз айында Ұлытау облысы әкімінің орынбасары болып тағайындалса, 2024 жылғы қазаннан бері облыс әкімі қызметін атқарып келеді.