Алматыда Абай күніне орай «Нұрлы ақыл - Разум и знания» викторинасы аясында «ABAI LIVE: 45 СӨЗ - 45 ОЙ» іс-шарасы өтті. Кездесу «Толық адам» жобасын іске асыру аясында ұйымдастырылып, ұлы қазақ ойшылының әдеби, философиялық және музыкалық мұрасын жастар арасында насихаттауға бағытталды.
Іс-шараға этномәдени бірлестіктердің өкілдері, жастар және қала тұрғындары қатысты. Қатысушылар Абайдың шығармашылық және философиялық мұрасының қазіргі қоғамдағы маңызын, сондай-ақ оның адамгершілік және рухани құндылықтарының жас ұрпақ үшін өзектілігін талқылады.
Бағдарлама аясында Абайдың шығармашылығы мен философиялық көзқарастарына арналған зияткерлік викторина өтті. Қатысушылар ойшылдың өмірі мен мұрасы туралы білімдерін көрсетіп, оның «Қара сөздерінің» мазмұны мен маңызын талқылады. Сонымен қатар жастар Абайға арналған авторлық хаттарын оқып, шығармашылық қойылымдар ұсынып, ақынның музыкалық шығармаларын орындады.
Абайдың 45 «Қара сөзінде» көтерілген білім мен еңбек, әділет пен жауапкершілік, адамгершілік, Отанға деген сүйіспеншілік және тұлғалық даму мәселелеріне ерекше назар аударылды. Қатысушылар Абай идеяларының қазіргі қоғам үшін де өзектілігін атап өтіп, оның мұрасы жауапты әрі білімді тұлғаны қалыптастыруға ықпал ететінін айтты.
Этномәдени бірлестіктер өкілдерінің қатысуы Абайдың рухани мұрасының жалпыұлттық маңызын айқындады. Гуманизм, ағартушылық, бірлік және адамгершілік құндылықтарға негізделген Абай шығармашылығы Қазақстанның мәдени мұрасының маңызды бөлігі болып табылады және түрлі этнос өкілдерін ортақ құндылықтар төңірегіне біріктіреді.
Кездесу Абай мұрасын жастар арасында насихаттауға, ұлттық мәдениетке қызығушылықты арттыруға және ортақ рухани әрі адамгершілік құндылықтар негізінде қоғамдық келісімді нығайтуға бағытталған жұмыстардың бірі болды.
Іс-шараны Алматы қаласы Ішкі саясат басқармасының Қоғамдық даму орталығы мен «Ақпараттық-ресурстық орталық» қоғамдық қоры Медеу ауданының Жастар комьюнити-орталығымен бірлесіп ұйымдастырды.