«Құрылтайға жол» ультрамарафоны жаңа межеге жетті. Меңдібай Әлімғазинов шәкірттерімен бірге Ақшатаудан Балқашқа дейінгі 160 шақырымға жуық жолды еңсерді. Астанадан жолға шыққалы бері команда 600 шақырымнан астам қашықтықты артта қалдырып, Алматыға дейінгі жолдың жартысына жуығын жүріп өтті.
Алматыға апарар жолдағы жаңа меже
Ақшатауда тынығып алғаннан кейін Меңдібай аға мен оны сүйемелдеп келе жатқан жастар қайтадан жолға шықты. Бұл кезең марафон басталғалы бергі ең ұзақ кезеңдердің бірі болды.
Ұзақ жолды еңсеріп келе жатса да, спортшы сандарға көп мән бермеуге тырысады. Оның айтуынша, жол үстінде келесі қадамды ойлап, осы сапардың қандай мақсатпен басталғанын ұмытпау маңызды.
Меңдібай ағаның бастамасы Құрылтай депутаттарының алдағы сайлауына арналған. Ол осы жүгіру арқылы қазақстандықтарға 23 тамыздағы дауыс беруге әр азаматтың өзі қатысуы қаншалықты маңызды екенін еске салғысы келеді.
Балқаш қатысушыларды қала туымен қарсы алды
Балқаш қаласының кіреберісінде марафоншы мен оның командасын жергілікті тұрғындар күтіп тұрды. Қатысушыларды қала туымен, ақжарма тілектермен және қолдау сөздерімен қарсы алды.
160 шақырымға жуық жолдан кейін мұндай кездесу спортшылар үшін маңызды оқиға болды. Меңдібай ағаның айтуынша, сол сәтте ол тұрғындардың жүгірудің өзін ғана емес, оның негізгі идеясын да қолдайтынын сезінген.
Балқаш «Құрылтайға жол» тарихына тұрғындары тікелей қосылған кезекті қала болды. Қарсы алушылардың қолындағы қала туы маршруттың жаңа кезеңін және балқаштықтардың ортақ бастамаға қосқан үлесін бейнеледі.
Жолды жалғастырар алдындағы бата
Қазақ дәстүрі бойынша қонақтарды дастарқан басына шақырып, ұлттық тағамдар мен сусындар ұсынды. Меңдібай аға мен оның шәкірттеріне денсаулық, төзімділік және марафонды аман-есен аяқтауды тіледі.
Алыс жолға шығар алдында берілген бата спортшы үшін ерекше мәнге ие болды. Ақсақалдардың ақ батасы командаға алдағы шақырымдарды еңсеруге демеу болып, жаңа күш берді.
Кеш ән-күймен, бимен және жылы жүздесумен жалғасты. Қарбалас күннен кейін қатысушыларға жайлы қону орны ұсынылып, олар сапардың келесі кезеңіне шығар алдында күш жинады.
Азаматтық ұстаным жеке шешімнен басталады
Өз үндеуінде Меңдібай аға ел өміріне қатысу дауыс беру күнінен әлдеқайда бұрын басталатынын атап өтті.
«Бұл марафонды бір оймен бастадым: азаматтық ұстаным сырттай бақылаудан емес, ортақ іске қатысудан басталады. Менің шешімім мені осы жолға алып шықты. Ал 23 тамызда әр қазақстандық өз таңдауын сайлау учаскесінде жасай алады», – деді марафоншы.
Ультрамарафон барысында бұл ой жұртшылықтан қызу қолдау тапты. Адамдар қатысушыларды жолда қарсы алып, көмек көрсетеді, қонуға орын ұсынып, жылы сөздерімен қолдайды. Әркім қолынан келгенін жасап жүр. Сайлау күні учаскеге барып, өз дауысын беру туралы шешім осындай жеке үлес болмақ.
Ортақ тарихқа айналған 600 шақырымнан астам жол
Меңдібай ағаның маршруты дәл Балқашта 600 шақырымдық межеден асты. Алайда бұл меженің маңызы тек спорттық нәтижемен шектелмейді. Жүріп өткен әр шақырымның артында кездесулер, тұрғындардың қолдауы және бүкіл елдің көз алдында өрбіп жатқан тарихтың жаңа қатысушылары тұр.
Жергілікті тұрғындарға қонақжайлығы, жайған дастарқаны және берген батасы үшін алғыс айтқан Меңдібай аға тынығудан кейін команданың Алматыға қарай жолын жалғастыратынын хабарлады.
600 шақырымнан астам жол артта қалды. Алда маршруттың екінші бөлігі және басты мақсат тұр: Алматыға жетіп, 23 тамызда ортақ болашағымызды айқындайтын тарихи сайлауға қатысу.