Атырауда төрт адамды өлтіргені үшін өмір бойына бас бостандығынан айырылған Сұлтан Сәрсемәлиевтің ісі бойынша апелляциялық шағым берілді, деп хабарлайды Arasha.kz.
"Сот кабинеті" жүйесіндегі мәліметке сәйкес, шағым 2026 жылғы 29 шілдеде тіркелген. Дегенмен Сұлтан Сәрсемәлиевтің өзі әзірге апелляциялық сот алқасына шағым түсірмеген.
Атырау облыстық сотының хабарлауынша, үкім шығарылған кезде судья бірнеше мекеме басшысына қатысты жекеше қаулы қабылдаған. Апелляциялық шағым сол мекемелердің бірінен түскен.
Еске сала кетейік, 2026 жылғы 14 шілдеде Сұлтан Сәрсемәлиев қайын жұртындағы төрт адамды өлтіргені үшін өмір бойына сотталған. Үкім әлі заңды күшіне енген жоқ.
Іс материалдары бойынша, Сәрсемәлиев 2025 жылдың мамырында жалдап тұрған үйінде қайын ағасы Наурыз Мұқанғалиевті пышақтап өлтірген. Кейін оның денесін үй маңына көміп, туыстары күмәнданбауы үшін марқұмның атынан хабарламалар жіберіп отырған.
Сол жылдың қазан айында ол Жангелдин ауылында тұратын бұрынғы қайын атасы мен енесін де өлтірген. Олардың мәйіттерін алдын ала қазылған жерге көмген.
Бұдан кейін Сәрсемәлиев бұрынғы әйелі Ақбаян мен қайын апасы Мейрамгүл Қарабалинаны Атырауға алып барған. Қалада Мейрамгүлді өлтіріп, мәйітін Наурыздың денесі көмілген жердің маңына жасырған.
Тергеу мен сот барысында оның адам өлтіруден бөлек, алаяқтық, ұрлық, жеке құжаттарды иемдену, мүлікті талан-таражға салу және несие рәсімдеу секілді бірқатар құқық бұзушылық жасағаны анықталған.
Сотта Сұлтан Сәрсемәлиев жасаған әрекеттеріне өкінетінін айтқанымен, болған жағдайға марқұмдардың өзін де кінәлаған.
Бұл қылмыстық істі судья Зарема Хамидуллина қараған.