7 қыркүйектен бастап қазақстандықтар зейнетақы жинақтарын басқаруға қатысты кеңейтілген мүмкіндіктерді пайдалана алады. Бұл өзгерістер Әлеуметтік кодекске енгізілген түзетулерге байланысты күшіне енді, деп Arasha.kz тілшісі Tengrinews.kz-ке сілтеме жасап хабарлайды.
Енді салымшының жеке зейнетақы шотындағы міндетті зейнетақы жарналары (МЗЖ), міндетті кәсіптік зейнетақы жарналары (МКЗЖ) және ерікті зейнетақы жарналары (ЕЗЖ) есебінен қалыптасқан қаражатын жеке басқарушы компанияларға сенімгерлік басқаруға беру көлемі 100 пайызға дейін ұлғайтылды.
Салымшылар зейнетақы қаражатының қанша бөлігін инвестициялық портфельді басқарушыға беретінін өздері анықтай алады. Сонымен қатар бір немесе бірнеше басқарушы компанияны және олардың инвестициялық портфельдерін таңдауға мүмкіндік бар.
БЖЗҚ мәліметінше, заңнамаға сәйкес инвестициялық портфельді басқарушылар үш түрлі портфель қалыптастыра алады. Олар: консервативті, қалыпты және тәуекелді. Әрқайсысы тәуекел деңгейі, күтілетін табыстылығы және инвестициялау мерзімі бойынша ерекшеленеді.
Әртүрлі инвестициялық портфельдерді таңдау мүмкіндігі Әлеуметтік кодекстің 37-1-бабында қарастырылған. Ал портфельдерді қалыптастыру талаптарын қаржы нарығы мен қаржы ұйымдарын реттеу, бақылау және қадағалау жөніндегі уәкілетті орган белгілейді.
Зейнетақы жинақтарын сенімгерлік басқаруға беру тәртібі мен инвестициялық мүмкіндіктер туралы толық ақпаратты БЖЗҚ-ның ресми сайтынан және invest.enpf.kz платформасынан алуға болады.
БЖЗҚ өкілдерінің айтуынша, бұл өзгерістер зейнетақы жүйесін салымшы пассивті қатысушы болатын модельден қаражатын басқару туралы шешім қабылдауға белсенді қатысатын жүйеге біртіндеп көшіруге мүмкіндік береді.
Қордағылардың пікірінше, инвестициялық стратегияны таңдау мүмкіндігінің кеңеюі және зейнетақы активтерін басқару туралы ақпараттың қолжетімді болуы азаматтардың болашақ зейнетақы табысына қатысты шешім қабылдауына көбірек мүмкіндік береді.