2030 жылға дейін Қазақстанда 1,35 миллион газ есептегішін жаңасына ауыстыру жоспарланып отыр. Олардың орнына көрсеткіштерді қашықтан жіберетін «ақылды» есептегіштер орнатылады. Жаңа құрылғылардың құнын кім өтейтіні белгілі болды, деп Arasha.kz тілшісі Tengrinews.kz-ке сілтеме жасап хабарлайды.
Газ есептегіштерін жаңа буын құрылғыларына ауыстыру заңнамалық тұрғыда бекітілді. 2026 жылғы 24 тамыздан бастап газбен жабдықтау мәселелеріне қатысты өзгерістер күшіне енді. Оған сәйкес, орнатылатын газ есептегіштері тұтынылған газ көлемі туралы деректерді қашықтан бере алуы керек.
Есептегішті кім ауыстырады?
Жаңарту жұмыстары онлайн режимде дерек жібере алмайтын ескі есептегіштері бар тұтынушыларға қатысты. Алайда бұл талап барлық газ пайдаланушыға бірдей қолданылмайды.
QazaqGaz Aimaq мәліметінше, газбен жабдықтау жүйесіне өзгерістер күшіне енгенге дейін, яғни 2026 жылғы 24 тамызға дейін қосылған жеке үйлер мен пәтерлердегі тұрмыстық тұтынушылар жаңа есептегішті өз қаражатына сатып алып, орнатуға міндетті емес.
Олардың есептегіштерін газ тарату ұйымы өз қаражаты есебінен ауыстырады. Бұл ретте азаматтар жаңа құрылғыны сатып алуға, оған техникалық қызмет көрсетуге және міндетті тексеруден өткізуге байланысты шығындардан босатылады.
Ал 2026 жылғы 24 тамыздан кейін газ желісіне алғаш рет қосылатын тұтынушылар жаңа талапқа бағынады. Олар қашықтан дерек жіберетін есептегішті өз қаражатына сатып алып, орнатуы тиіс.
Бұл талап көпқабатты үйлерде газды тек тамақ дайындау үшін пайдаланатын тұрғындарға қатысты емес.
Сондай-ақ өнеркәсіптік және коммуналдық-тұрмыстық тұтынушылар газ есептегіштерін өз қаражатына сатып алады.
Ескі есептегіштер қашан ауыстырылады?
Ескі есептегіштерді бірден ауыстыру талап етілмейді. Дегенмен заңда жаңарту жұмыстарының нақты мерзімі белгіленген.
QazaqGaz Aimaq 2030 жылғы 1 қаңтарға дейін 1,35 миллион газ есептегішін жаңартуды жоспарлап отыр.
Жоба екі кезең бойынша жүзеге асырылады:
2026–2027 жылдары Шымкент қаласы, Түркістан және Қызылорда облыстарында 455,3 мың есептегіш орнатылады;
2027–2029 жылдары Қазақстанның қалған газдандырылған өңірлерінде 896,8 мың есептегіш ауыстырылады.
Ал жаңа талап бойынша есептегішті өз қаражатына сатып алуға тиіс тұтынушылар құрылғыны 2027 жылғы 31 желтоқсанға дейін орнатуы қажет.
Қазіргі уақытта жобаның бірінші кезеңі жүзеге асырылып жатыр