Сенегал жағалауында мигранттар мінген ағаш қайық аударылып, кемінде 39 адам көз жұмды. Бір адам аман құтқарылған, деп хабарлайды Arasha.kz.
Қайық Испанияға қарайтын Канар аралдарына бағыт алған. Апат Дакар мен Сен-Луи қалаларының арасындағы Кебемер ауданына жақын маңда болған.
Құтқарушылар жағалаудың 25 шақырымдық бөлігінде іздестіру жұмыстарын жүргізіп жатыр. Алайда теңіз ағыстары мен апат болған аумаққа жетудің қиындығы іздеу шараларына кедергі келтіруде.
Сенегал президенті Бассиру Диомай Фай қаза болғандардың жақындарына көңіл айтты. Ол азаматтарды өміріне қауіп төндіретін теңіз сапарларынан бас тартуға шақырып, заңсыз көші-қонды ұйымдастырушыларға қарсы күресті күшейтуге уәде берді.
Испаниядағы Walking Borders ұйымының мәліметінше, 2026 жылдың алғашқы бес айында Атлант мұхиты арқылы Канар аралдарына жетуге әрекеттенген 635 мигрант қаза тапқан.