Мемлекет басшысы Қасым-Жомарт Тоқаев Орталық сайлау комиссиясының төрағасы Нұрлан Әбдіровті қабылдап, алдағы мәслихат депутаттарының кезектен тыс сайлауына дайындық барысын талқылады, деп хабарлайды Arasha.kz.
Ақорданың мәліметінше, кездесу барысында Президентке 2026 жылғы 29 қарашада өтетін барлық деңгейдегі мәслихат депутаттарының кезектен тыс сайлауына әзірлік жұмыстары туралы баяндалды. Орталық сайлау комиссиясының төрағасы Нұрлан Әбдіров мемлекет басшысына сайлау органдарының атқарып жатқан жұмыстары жөнінде ақпарат берді.
Қасым-Жомарт Тоқаев алдағы саяси науқанды заң талаптарына толық сәйкес ұйымдастырудың маңыздылығына тоқталды.
Атап айтқанда, Президент сайлауды "Заң және тәртіп" конституциялық қағидаты негізінде өткізуді, сондай-ақ барлық кандидаттар мен саяси партияларға тең жағдай жасауды маңызды міндеттердің бірі ретінде атап өтті.
Мемлекет басшысы сайлау барысында заңдылықтың сақталуы мен қатысушыларға бірдей мүмкіндік берілуіне ерекше назар аударды. Сонымен қатар Қасым-Жомарт Тоқаев депутаттық құрамның жаңаруы жергілікті өкілді органдардың қызметіне оң ықпал ететініне тоқталды. Президенттің пікірінше, алдағы сайлау нәтижесінде депутаттық корпустың жаңаруы мәслихаттардың жұмысын едәуір күшейтеді.
Мәслихат сайлауы қашан өтеді?
Еске салайық, Қазақстанда барлық деңгейдегі мәслихат депутаттарының кезектен тыс сайлауы 2026 жылғы 29 қарашаға белгіленген.
Орталық сайлау комиссиясы тиісті қаулыны 13 қазанда қабылдаған. Оған дейін, 12 қазанда Президенттің Жарлығымен барлық деңгейдегі мәслихаттардың өкілеттігі мерзімінен бұрын тоқтатылған.
Ресми күнтізбелік жоспарға сәйкес, депутаттыққа кандидаттарды ұсыну және өзін-өзі ұсыну кезеңі 14-27 қазан аралығында өтті. Ал кандидаттар мен партиялық тізімдерді тіркеу 1 қарашада аяқталды.
Қазіргі уақытта сайлау комиссиялары дауыс беруді ұйымдастыру және өткізуге қатысты дайындық жұмыстарын жалғастырып жатыр.
Айта кетейік, мәслихаттар – өңірлердегі халықтың мүддесін білдіретін жергілікті өкілді органдар. Олардың депутаттары тиісті әкімшілік-аумақтық бірліктің әлеуметтік-экономикалық дамуына қатысты мәселелерді қарауға және жергілікті деңгейде қабылданатын шешімдерге қатысады. Мәслихат депутаттары жалпыға бірдей, тең және төте сайлау құқығы негізінде жасырын дауыс беру арқылы бес жыл мерзімге сайланады. Алдағы сайлауда Қазақстанның барлық деңгейдегі мәслихаттарының жаңа депутаттық құрамы жасақталады.