Ақтөбеде кәсіпкерді атып өлтірген күдікті ұсталды

Бүгін, 15:42 / Ахмет Қанатұлы
Фото: instagram.com/aqtobe_sergek

Ақтөбеде кәсіпкерді атып өлтіру дерегі бойынша күдікті ұсталды. Құқық қорғау органдары жүргізген жедел іздестіру шараларының нәтижесінде қылмысқа қатысы болуы мүмкін азамат анықталып, уақытша ұстау изоляторына қамалды, деп хабарлайды Arasha.kz.

Бұл туралы Ақтөбе облыстық полиция департаментінің баспасөз қызметі мәлімдеді. Ведомство ақпаратына сәйкес, кәсіпкердің өліміне қатысты қылмысты ашу мақсатында кешенді жедел іздестіру жұмыстары жүргізілген. Нәтижесінде полиция қызметкерлері күдікті ретінде Ақтөбе қаласының тұрғынын ұстады. Оның Қазақстан Республикасының азаматы екені белгілі болды.

Полиция мәліметінше, кәсіпкердің өліміне байланысты тергеу жұмыстарына ерекше назар аударылған. Қылмысты ашу үшін Ақтөбеге Қазақстан Республикасы Ішкі істер министрлігінің орталық аппаратынан тәжірибелі жедел қызметкерлер жіберілген. Олар жергілікті полиция қызметкерлерімен бірлесіп, оқиғаның мән-жайын анықтау және күдіктіні іздестіру бойынша жұмыс жүргізген.

"Жүргізілген кешенді жедел іздестіру іс-шаралары нәтижесінде полиция қызметкерлері кәсіпкерді өлтірді деген күдікке ілінген азаматты анықтап, ұстады. Күдікті – Қазақстан Республикасының азаматы, Ақтөбе қаласының тұрғыны", – деп хабарлады полиция департаменті.

Қазіргі уақытта ұсталған азамат уақытша ұстау изоляторына жеткізілген. Аталған дерек бойынша сотқа дейінгі тергеп-тексеру амалдары жалғасып жатыр. Тергеушілер қылмыстың жасалу себептерін, оқиғаның толық мән-жайын және күдіктінің ықтимал қатысын анықтауда.

Тэгтер:

Ақтөбе кәсіпкер күдікті