Ақтөбеде жол бойында жараланған аққуды қызметкер құтқарып қалды

20 қараша, 2026 / Ахмет Қанатұлы
Фото: ҚазАвтоЖол

Ақтөбе облысында тасжол бойында ұша алмай қалған жаралы аққу құтқарылды. Құсты байқап қалған жол қызметкері оны қауіпсіз жерге шығарып, тиісті мамандарға тапсырды, деп хабарлайды Arasha.kz.

Оқиға "Ақтөбе – Мақат" автомобиль жолының Қандыағаш бағытындағы бөлігінде болған. "ҚазАвтоЖол" ұлттық компаниясының мәліметінше, облыстық филиал қызметкері жол жиегінде қозғала алмай жатқан аққуды байқап қалған.

Маман құстың жағдайын тексеру барысында оның қанаты жарақаттанғанын анықтаған. Аққудың өздігінен ұша алмайтынын байқаған қызметкер оны қауіпті аймақтан алып шыққан.

"Кейде үлкен жолдың бойында адамға ғана емес, аң-құстарға да көмек қажет болады. Жол маманы қанатты құстың тағдырына бейжай қарамай, оны қауіпсіз жерге алып шықты", – делінген компания хабарламасында.

Құтқарылған аққуға қажетті медициналық көмек көрсетіліп, арнайы күтім жасалуы жоспарланып отыр. Ол үшін құс тиісті мекемеге тапсырылмақ. Жол қызметкерінің дер кезінде әрекет етуі жаралы құстың қауіпсіз жерге жеткізілуіне мүмкіндік берді.

Тэгтер:

Ақтөбе облысы аққу