Казак атаманының айтқаны

283

Zhasalash.kz сайтына шыққан «Қостанайлық казактар әнұранды айтпайды» атты материалға байланысты әлеуметтік желіде арнайы мәлімдеме пайда болды.

Жауап сөзде мақалаға арқау болған облыстық казактар қауымдастығының атаманы Виктор Чемпалов арнайы мәлімдеме жасаған. Атаман Zhasalash.kz көтерген мәселені орынсыз санайтынын, сондай-ақ, өсек-аяңға жол бермеу үшін арнайы пікір білдіріп отырғанын айтады.

«Жарияланған материалда басылған суретке менің қолымның жүрек тұсыма әлі жетпеген сәті түсіп қалған. Бұл менің өз отанымның гимнін құрметтемейтінімді білдірмейді, сосын мен оны ешқандай жағдайда да елеусіз қалдырмаймын. Менің қасымда тұрған казак та солай. Ал, киім формасына келсек, — бұл бүкіл ел бойынша казактардың ұлттық киімі. Ол әскери форма емес…» дейді атаман мәлімдемесінде.

Сонымен қатар, атаман өзінің Қазақстанда туғанын, саналы ғұмырын отбасымен бірге осында өткізіп келе жатқанын, Қазақстан Халықтары Ассамблеясының мүшесі екенін айта келіп, өз елінің нағыз патриоты екенін ескертеді.

«Мен өз елімнің патриоты екенімді сенімді түрде айта алам, және аталмыш басылымға шыққан журналистік материалды жөнсіз һәм кәсіби емес деп есептеймін. Бұл сурет біздің мемлекеттік рәміздеріміздің беделін түсіргендей көрінсе, бәрінен казактар қауымдастығы және жеке өз атымнан кешірім сұраймын», деп сөзін аяқтайды атаман.

Дереккөз: zhasalash.kz