26 қыркүйекте Алматы қаласында режиссер Ақан Сатаевтың «Томирис» фильмінің тұсаукесері өтті. Алайда көркем фильмнің көрсетілімі орыс тілінде болды. Фильм Алматы кинотеатрларына да жол тартқан, бірақ онда да қазақша көрсетілмейтін болып шықты.

Сақ патшасы Тұмар ханым туралы көркем фильмнің қазақша аудармасын жасадым деген дәстүрлі әнші, өнер зерттеушісі Ерлан Төлеутай фильмнің тұсаукесері не үшін қазақ тілінде көрсетпегеніне наразылық білдірді. Ол мұны  мемлекеттік тілге құрметсіздік деп түсінеді екен.

-«Оқырманға түсінікті болу үшін айта кетейін фильм сақ заманының атмосферасын беру үшін көне түрік тілінде түсірілді. Міне, осы көне түрік тілінен аталмыш туынды қазақ тіліне аударылды. Қазақша аудармасын жасаған мен. Маған дейін бірнеше аудармашы талап қылған екен, бірақ көңілдегідей киноға лайықтап тəржімалай алмапты. Кейін фильм режиссерінің өтінішімен бастан аяқ қотарып аударып шықтым. Алайда аудармамды «Сатайфильмге» тапсыру оңай болған жоқ. Режиссер Ақан Сатаев жүз беттей аудармамды бір айға жуық уақыт қабылдады. Күнде жылан арбаған торғайдай бір-бірімізге қарап бірнеше сағаттан аңдысып отырамыз. Сөйлем түгілі əрбір сөзге үңілісеміз. Менің кез келген тарихи фильмді жазғандағы басты қаруым – қазақтың ескі қолды жалпақ тілі. Осыны қырнап, жонып кинотіліне келтіремін, ыңғайлаймын. Орнымен қолданған архаизмдер фильмге ескіліктің сарынын естіріп, бағзылықтың атмосферасын береді. Режиссер Ақан Сатаев менің бұл тәсіліме кет əрі емес, бірақ бұл ескі сөздер жаңа көрерменге түсінікті болсын деп талап қояды ол маған. Міне, осы жерге келгенде бұл пақырыңыздың «қиналған Жамбыл жері осы» болады. Сөйтіп современный көрермен түсінбейді деген үкіммен талай қария сөздерім құрбандыққа шалынды ғой. Есіме түссе əлі ішім удай ашиды.
Несін айтасыз, сол есіл еңбек бүгінгі көрсетілімде желге ұшты. Көрсетілімге фильмнің орысша нұсқасы қойылыпты. Айтпақшы фильмнің орысша нұсқасы қазақша субтитрмен, қазақша нұсқасы орысша субтитрмен жасалған болатын», -дейді Ерлан Төлеутай өзінің фейсбук парақшасында.

Ал көрермендердің бірі Ернар Алмабек «Қазақфильм» фильм шығарды дегенше, қазақша сеанс іздеп әлек болам десеңші…» деп жазыпты.

-«Кеше өзім барып көріп келген «Томирис» фильміне үйдегілерді апарайын деген едім. Туындыны қазақ тілінде көрсететін кинотеатр таппай отырмын. Kino.kz сайтын қарасам, қазақ тілінде сеанс жоқ дейді. Таңнан бері кинотеатрларға қайта-қайта хабарласып жатырмын. Әзірге көбісі тұтқасын көтермеді.Тұтқаны көтерген Silk Way Cinema кинотеатрының қызметшісі: «Кейінірек хабарласыңызшы. Нақты айта алмаймын. Бірақ бәрі орысша ғой деймін»,- деп жауап берді.