Астанада «Қазақстанның 100 жаңа есімі» жобасына енген 102 жеңімпазбен кездесу барысында Елбасы Нұрсұлтан Назарбаев латын әліпбиіне не үшін көшетіндігімізді түсіндірді, деп хабарлайды ҚазАқпарат.

«Кириллицаның бірнеше әрпі қазақ лексикасына мүлдем қатыспайды. Қазақ тілінде «ь», «ъ» белгілері, «ч», «щ», «я» әріптері жоқ. Японды біз жапон дейміз. Соның барлығы біздің тілімізді, жазуымызды, жұрттың оқуын  қиындатты. Мұның барлығы ең негізгі емес те шығар. Ең негізгісі, мына заманмен, болашақпен бірге болу үшін ол бізге керек. Латын әліпбиіне көшу арқылы біздің барлығымыз да  ақпараттың дамып келе жатқан кеңістігіне енетін боламыз. Бұған дейін айтқанымдай, интернет тілі – бұл ғылым мен мәдениет тілі.  Біз бұл бағытта ілгерілеп те келеміз. Мен аталған әліпби туралы Жарлық та шығардым, оны өздеріңізде білесіздер», – деді Елбасы кездесу барысында.

ҚР Президенті гуманитарлық білім беру мәселесіне де кеңінен тоқталды және гуманитарлық саладағы 18 кітаптың қазақ тіліне аударылып жатқанын және оны мектептер де, университет студентері де оқитындығын баса айтты.