Еліміздің қай өңірі болмасын, талантты тұлғаларға кенде болмаған. Десек те, өнерпаздарды көптеп дүниеге әкелген аймақтардың арасында Тарбағатай өңірі ерекшеленіп көрінеді. Біздің кейіпкеріміз Әсем Ахманова да Шығыс Қазақстан облысы, Тарбағатай ауданы, Ақсуат ауылдық округына қарасты Сәтбаев ауылында дүниеге келген.

Жастайынан өнерге жаны құмар, ән десе ішкен асын жерге қоятын Әсем ауылда жүріп-ақ алдымен аудандық, облыстық байқауларға қатысты. Кейінірек республикалық, халықаралық өнер байқауларында бақ сынап, жүлделі орындардан көрінуе мүмкіндік алды.

Өнерді жеткіншектің анасы:

– Әсем кішкентайынан әнге құмар болды. Бір естіген әнін қағып алып, айтып беретін. Мектепте ән айтып, көзге түсті. Сосын біртіндеп басқа да конкурстарға бара бастады. Қазір «Алаш» өнер орталығында білім алады. Халықаралық конкурсқа қатысуға дайындалып жатыр,– дейді.

Биыл елордада «Алаш» өнер орталығының мұрындық болуымен «Жас жұлдыз» атты халықаралық өнер додасы өткен болатын. Осы жарыста бақ сынаған Әсем Ахманова үздік өнерімен көзге түсіп, бірінші орынды жеңіп алды. Сөйтіп, тағы бір халықаралық конкурста бақ сынауға мүмкіндік беретін тиісті сертификатқа қол жеткізді. Қазіргі таңда карантин шаралары толық аяқталмағандықтан дарыстың нақты қай күні өтетіні әлі анықтала қойған жоқ.

Жалпы, елімізде Әсем сияқты өнерлі жастарды қолдаумен айналысатын жобалар аз емес. Солардың бірі «Шығармашыл жастарды қолдау жөніндегі іс-шараларды ұйымдастыру» әлеуметтік жобасы. Әсем Ахманова да осы жоба аясында тиісті республикалық грантқа иесі екенін атап өткен ләзім.

«Шығармашыл жастарды қолдау бойынша іс-шараларды ұйымдастыру» әлеуметтік жобасы «Мүгедектерді оңалту орталығы Логос-Қарағанды» Қоғамдық бірлестігі ҚР Ақпарат және қоғамдық даму министрлігінің қолдауымен «Азаматтық бастамаларды қолдау орталығы» КЕАҚ мемлекеттік грантының аясында жүзеге асырылуда.

Көптеген өнерпаздарға жәрдемі тиген жоба бірінші кезекте халықтың әлеуметтік осал топтарына қолдау көрсетіп, жағдай жасау үшін гранттар берумен айналысады. Бұл жоба аясында 14-29 жас аралығындағы дарынды қазақстандықтарға республикалық байқаулар мен фестивальдерге қатысуға 200 мың теңге көлемінде 30 грант, сонымен қатар халықаралық байқаулар мен фестивальдерге бақ сынауға жол ашатын 700 мың теңге көлеміндегі 20 грант ұтып алуға мүмкіндік беріледі. Яғни, осынша өнерпаздың жолын ашуға себепкер болады десек қателеспейміз. Солардың қатарында әнші Әсем Ахманова да бар.