Қазақстанда елорда мен Ақмола облысының даму жоспарларын сәйкестендіретін бірыңғай қала құрылысы саясаты әзірленетін болады.

Үкімет отырысында Астана агломерациясын дамытудың 2024-2028 жылдарға арналған кешенді жоспары қаралып жатыр.

Премьер-Министрдің орынбасары – ұлттық экономика министрі Нұрлан Байбазаровтың айтуынша, 10 жыл ішінде елорда тұрғындарының саны 46%-ға артқан.

Болжам бойынша, 2035 жылға қарай Астанада 2,3 млн адам тұрады.

Агломерацияны аумақтық дамыту шеңберінде бірыңғай қала құрылысы саясатын әзірлеу және елді мекендердің әкімшілік шекараларын белгілеу жоспарлануда.

«Қосшы қаласында 1 200 орындық мектеп, 280 орындық балабақша және 350 төсек-орындық көпбейінді аурухана салынады. Елордада инвесторлардың өз қаражаты есебінен 900 студентке арналған тау-кен техникалық колледжін және балаларды оңалту орталығын салу жоспарлануда», — деді Н.Байбазаров.

Ауылдық жерлерде бірқатар әлеуметтік нысан, соның ішінде 9 мәдениет үйі мен медициналық-санитариялық алғашқы көмек орталығы салынады. Агломерация аясында экоқалашықтар құру көзделіп отыр. 940 гектардан асатын аумақта шағын бизнесті жүргізуге арналған үй-жайлары бар тұрғын үйлер салынады.