ҚР Үкіметінің қарызды басқару саясаты халықаралық тәжірибеге толық сәйкес келеді. Бұл туралы Премьер-министр Олжас Бектенов Сенат депутаттарының мемлекеттік қарызды шектеу және қарыз алу шектерінің формалдық сипатын жою мәселелеріне қатысты сауалына жауап беру барысында мәлімдеді.

«Халықаралық тәжірибеде мемлекеттік қарыздың қауіпсіз деңгейі ЖІӨ-нің 50-60%-ынан аспау керек деп есептеледі. Біздің елде мемлекеттік қарызды басқару саясаты 2030 жылға дейінгі мемлекеттік қаржыны басқару тұжырымдамасына сәйкес жүзеге асырылып жатыр. Бұл шеңберде мемлекеттік қарыз ЖІӨ-нің 32%-нан, үкіметтік қарыз 27,5%-нан, ал жиынтық мемлекеттік және квазимемлекеттік қарыз 53,2%-нан аспауы тиіс. Сонымен қатар, үкіметтік қарызды өтеу республикалық бюджет шығыстарының 10%-ынан аспайды», – деді Бектенов.

Сондай-ақ, премьер-министрдің айтуынша, мемлекеттік қарыздың осалдығын бағалау үшін Еуропалық Одақ тәжірибесіне негізделген 19 көрсеткіш бойынша талдау жүргізілуде.

«Бұл көрсеткіштер негізінен мемлекеттік қарыздың бюджет кірістеріне, сыртқы сауда операцияларынан түскен кірістерге, қарызды өтеу бойынша экспорттық түсімдерге қатынасына және басқа да көрсеткіштерге байланысты есептеледі. Талдау нәтижесінде қарыз осалдығының маңызды индикаторлары анықталып, олар 2030 жылға дейінгі мемлекеттік қаржыны басқару тұжырымдамасында көрініс табуы мүмкін», – деп қосты ол.

Айта кетсек, 11 қарашада ҚазТАГ хабарлағандай, Қазақстан бюджет тапшылығы жағдайында Азия даму банкі мен Азия инфрақұрылымдық инвестициялар банкінен шамамен 366 млрд теңге қарыз алуды жоспарлап отыр. 20 қарашада Халықаралық қайта құру және даму банкінің (ХҚДБ) қарызы туралы ақпарат жарияланып, нәтижесінде үш банктен алынатын қарыздың жалпы сомасы 636 млрд теңгеге жетті.

3 желтоқсанда ҚазТАГ Сенат депутаттарының сауалына Премьер-министр Олжас Бектеновтің жауабын жариялады. Онда премьер-министр Қазақстанның әрбір халықаралық қарызының тиімділігі жан-жақты талданатынын және Үкіметтің мемлекеттік қарыз бойынша жағдай туралы есепті Мәжіліске ұсынғанын айтты. Сонымен қатар, ол мемлекеттік қарызды ескере отырып, Қазақстанның 10 жылдық даму болжамы әзірленетінін және әрбір қарыз жобасының міндетті сараптамалардан өтетінін жеткізді.