АҚШ президенті Дональд Трамп ресейлік көшбасшы Владимир Путин Украинадағы соғысты тоқтату үшін келісімге келмегендіктен, «Ресейді құртып жатыр» деп мәлімдеді.

«Ол келісім жасауы керек. Менің ойымша, ол келісімге келмей, Ресейді құртып жатыр. Егер келісімге келмесе Ресей үлкен қиындықтарға тап болады деп ойлаймын», — деді журналистермен сөйлескен Трамп.

«Ол жағдайдың жақсы еместігіне риза емес шығар. Көптеген адамдар соғыс бір аптада аяқталады деп ойлаған, бірақ қазір үш жылға созылды», — деп қосты АҚШ президенті.

Трамптың айтуынша, Украина президенті Владимир Зеленский қақтығысты тоқтату үшін келісім жасауға дайын.

Сондай-ақ, Трамп Путинмен жақын арада кездесуді жоспарлап отырғанын айтты. Оның айтуынша, кездесу дайындығы қазірдің өзінде жүріп жатыр.

«Біз бұл кездесуді мүмкіндігінше тезірек өткізуге тырысамыз. Білесіз бе, Ресей мен Украина арасындағы соғыс мүлде басталмауы керек еді», — деді Трамп.

Журналистер Трампқа президент қызметіне кіріскен алғашқы күні соғысты тоқтатуға уәде бергенін еске салғанда, ол: «Ол үшін менде әлі жарты күнім бар», — деп жауап берді.