CNN-ге берген сұхбатында Мемлекеттік хатшы Марко Рубио «мүмкін, Зеленский бейбіт келісім жасағысы келмейтін шығар» деп те атап өтті.

Рубио АҚШ вице-президенті Джей Ди Вэнспен кездесу барысында Зеленскийдің оған деген қарым-қатынасын сынады. Вэнс «бейбітшілік пен өркендеуге апаратын жол дипломатия арқылы өтуі мүмкін» деп айтқанда, Украина президенті 2019 жылы Ресей президенті Владимир Путинмен келіссөздер жүргізгенін және Донбасста атысты тоқтату туралы келісімдерге қол қойғанын, бірақ Путин оларды бұзғанын еске салды.

Рубионың пікірінше, осы сәттен бастап кездесу «жоспар бойынша өтпеді». «Бұл бейбітшілікке қол жеткізуге бағытталған күш-жігерді ашық түрде бұзу – бүгінге дейін олармен байланыс орнатқан барлық адамдар үшін үлкен көңілсіздік. Менің ойымша, ол кездесуді осындай нәтижеге әкелгені үшін уақытты босқа өткізгеніне кешірім сұрауы керек», – деді Мемлекеттік хатшы.

«Сен Владимир Путин мен Ресей Федерациясын келіссөз үстеліне қалай отырғызбақсың, тіпті бейбітшілік мүмкіндігін талқылау үшін? – деді Рубио. – Оны тілдеп, айыптау арқылы бұған қол жеткізе алмайсың».

CNN журналисі бұған жауап ретінде Рубионы еске салып, оның өзі Путинге сенуге болмайды деп айтқанын атап өтті. Мемлекеттік хатшы АҚШ-тың бұл жағдайдағы ұстанымы «сен, бірақ тексер» қағидаты бойынша болатынын және Трампты жалған мәмілеге тартпайтынын мәлімдеді.