2024 жылы Парижде өткен Олимпиада ойындарының жүлдегерлері Ғұсман Қырғызбаев пен Александра Ле «Алматы – біздің ортақ үйіміз» акциясы аясында Алматыдағы экологиялық марафонға қатысты.

Дзюдодан қола жүлдегер Қырғызбаев мектебінің аумағын тазартуға көмектесіп, осындай бастамалардың маңыздылығын атап өтті.

Оқ атудан қола жүлде иегері Ле де акцияны қолдап, пікір білдірді.

«Менің ойымша, мұндай іс-шараларды жиі өткізу керек. Егер әрбір қала тұрғыны экологияға қамқорлық жасаса, мегаполистегі өмір жайлы бола түседі», – деді ол.

Спортшылардың айтуынша, экологиялық марафон қаланы тазарту мүмкіндігі ғана емес, сонымен қатар салауатты өмір салтын насихаттаудың бір жолы.

Олимпиадашылар жастарға үлгі көрсетіп, қоршаған ортаға жауапкершілікпен қараудың маңыздылығын еске салды.