Ақтөбе облысының Алға ауданында газ құю бекеті жарылылып, өртеніп кеткен. Абырой болғанда адам шығыны жоқ.
Төтенше жағдайлар департаментінде жарылыс туралы ақпарат 17 шілдеде 18:50 шамасында келіп түскененін айтты.
«Алғадағы Абай көшесінде орналасқан «ЛиманГаз» газ құю бекетіндегі көлемі 46 текше метр болатын цистернаның екі рет жарылғаны туралы хабарланды. Оқиға орнына 7 өрт сөндіру көлігі мен 26 қызметкер жедел аттанды. Өрт салдарынан «Тойота Камри» көлігі, тиегіш көлік жанып, бекеттің 22 шаршы метр болатын әкімшілік ғимараты жойылды», – делінген хабарламада.
Ведомство өкілдері бекеттің үш қызметкері өз беттерінше ғимараттан шыға алғанын мәлімдеді. Зардап шеккендер мен құрбандар жоқ.
Өрт 19:44-те ауыздықталып, 20:02-де толығымен сөндірілді. Қазір себебі анықталып жатыр.
