2025 жылғы 24 маусымда Алматы облысының әкімі Бақытнұр Бақытұлын облыс әкімінің орынбасары етіп тағайындады, деп хабарлайды Arasha.kz.

Бұл бір қарағанда кезекті кадрлық ауыс-түйіс сияқты көрінеді. Алайда бұл тағайындаудың астарында туыстық байланыстар, саяси ықпал және атышулы жемқорлық істерінің ізі жатыр.

Бақытнұр Бақытұлы кім?

Бақытнұр Бақытұлы – мемлекеттік басқару жүйесінде жаңа адам емес. Ол әр жылдары прокуратурада, түрлі бизнес құрылымдарда, партиялық мектептерде қызмет атқарған. Бірақ оның шынайы ықпалы жұмыс тәжірибесінде емес, әкесінің беделінде жатыр.

«Ет королінің» ұлы

Бақытнұрдың әкесі – Бақыт Атайбеков. Ол – белгілі ауыл шаруашылығы магнаты, бұрынғы «Жетісу» ӘКК басшысы, қазіргі уақытта Алматы облыстық мәслихатының депутаты. Бақылаушылардың айтуынша, ол Dinara Group агрохолдингінің бейресми иесі. Бұл холдинг өңірдегі ауыл шаруашылығындағы басты ойыншылардың бірі.

Отбасы активтері қатарында:

• TОО Agro-Food,
• Dinara-Ranch,
• Tengri Milk,
• Dinara Group Ltd., One Capital Ltd., CAAIF LP секілді шетелдік құрылымдар да бар.

Айта кетерлігі, холдингтің 49%-ы «Самұрық-Қазына Инвест» компаниясына тиесілі. Бұл холдингтің мемлекеттік қолдау мен ықпалды одаққа ие екенін көрсетеді.

Бұрынғы субсидияларды бөлудегі жемқорлық дауында Атайбековтің аты жиі аталды. Сол іс бойынша облыстық ауыл шаруашылығы басқармасының басшысы сотталған. Алайда Атайбеков қылмыстық жауапкершіліктен сытылып кете алған.

«Қорғас ісіндегі» рөлі

Бақытнұр Бақытұлы халықаралық шекара маңы ынтымақтастығы орталығы (МЦПС «Қорғас») бойынша прокурорлық тексерудің де негізгі фигуранттарының бірі. Тексеріс қорытындысы бойынша ол директорлар кеңесінің мүшесі бола тұра, өз міндетін атқармаған және басқару жүйесінің бұзылуына жол берген.

Осы істе мына тұлғалар да жауапкершілікке тартылды:

• Ерсін Оразаев – «Қорғас» МЦПС басшысы;
• Әсет Қанағатов – Жетісу облысы әкімінің орынбасары, бұрынғы ТКШ басшысы, дизель отынындағы жемқорлықпен аты шыққан;
• Данияр Айқынбаев – «Жетісу» ӘКК басшысы, Жетісу облысы әкімінің күйеу баласының досы.

Сұрақ: стратегиялық маңызды нысанды құлдыратқан тұлға қалайша жоғары қызметке тағайындалады?

Мұра ма, меритократия ма?

Қазақстанда қызметке орналасу үшін конкурсты жеңіп, мінсіз беделге ие болу міндетті емес сияқты. «Біреудің баласы» болу жеткілікті. Бақытнұр Бақытұлының тағайындалуы жай ғана мансаптық өсу емес, бұл шенеуніктік непотизмнің, билік пен бизнестің араласуының, жазасыздықтың көрінісі.