Алматыда 14 жылдан бері алғаш рет биік таулы «Медеу» кешеніне апаратын жол жөнделді. Жолды жөндеуге қала әкімі Ерболат Досаевтың өзі араласқан.

Қаланың басты көрікті жерінің бірі саналатын «Медеуге» апаратын Керей мен Жәнібек хандар көшесіне жаңа асфальт төселіп, жол белгілері және жаяу жүргіншілерге арналған қауіпсіз тротуарлар орнатылды.

Ұзындығы 10 км болатын жол бөлігіне ыстыққа және тозуға төзімді полимерасфальтбетон төселді, бұл материалдың қызмет ету мерзімі де ұзағырақ. Сонымен қатар, 14 км жаңа тротуарлар мен жаяу жүргіншілер мен жүргізушілердің қауіпсіздігі үшін 37 «қалқымалы» люк орнатылды.

«Демалыс күндері қала тұрғындары ол жаққа жиі барады, бірі жаяу, келесісі қоғамдық көлікпен көтеріледі, сондықтан тротуар мен жақсы жол жабыны – бұл қажеттілік», – деді Жол қауіпсіздігі қауымдастығының өкілі Арсен Шакуов.