Қостанай облысы, Қарабалық ауданының орталығы Қарабалық кентінде қазақ хандығының 550 жылдыға орай қойылған қазақ батырының алып ескерткішін трактормен тартып, құлатты. Мұндай хабарды facebook қолданушысы Бекзат Құсайын парақшасында жазып, ескерткіштің құлатылған сәт көрсетілген видеоны да бөліскен екен.
Жазба авторының жазуынша, батыр ескерткішін орнатуға атасы Асылбек Өтешев ойға-қырға шапқылап, қаражат іздеп, жергілікті биліктен де көмек сұрап жүріп орнатқызған екен. Ескерткіш авторы – мүсінші Ертуған Шаймағамбетов.
Жазбада құлатылған ескерткіштің орнына басқа, мықты металдан жасалған ескерткіш қойылады-мыс делінген. Алайда, батыр ескерткішінің не себепті құлатылғаны айтылмайды. Ескерткішті құлатуға байланысты Қарабалық ауданы әкімшілігінің ресми ве-сайтында да ешқандай ақпарат жоқ. Ал батыр ескерткішін құлатып жатқан видеоны көрген желі қолданушылар әртүрлі пікір білдіріп жатыр.
