Қостанай облысы Меңдіқара ауданының білім бөлімінің бастығы Қалыбек Жүгінісов өз үйінде суицид жасады.
Қайғылы оқиға 2 маусымда Боровская ауылында болды. Қ.Жүгінісов сыбайлас жемқорлық жасады деген күдікке ілініп, екі апта үй қамақта жатқан. Әйелі Қостанайға кеткен күні ол өз-өзіне қол жұмсаған. Бұл туралы Stan.kz жазды.
Меңдіқара аудандық білім бөлімі басшысының міндетін атқарушы Азамат Жанайдаров Қалыбек Жүгінісовтің Қызылорда облысы Арал қаласында дүниеге келгенін айтты. Ол 2015 жылы Қостанай облысына келіп, Меңдіқара ауданы әкімінің орынбасары қызметіне орналасты. Осыдан үш жыл бұрын аудандық білім бөлімінің бастығы болып тағайындалды.
«Біздің ұжым ол кісіні қатты құрметтейтін. Ол үнемі барлығына көмектесіп, жұмысқа үлкен жауапкершілікпен қарайтын. Қалыбек Жүгінісовтің өлімі бізді есеңгіретіп тастады. Бұл біз үшін орны толмас қайғы. Отбасының қайғысына ортақпыз», – дейді А.Жанайдаров.
Қалыбек Жүгінісовтің артында әйелі мен үш баласы қалды.
