Қазақстаннан босқын мәртебесін ала алмаған Қытай азаматы, этникалық қазақ Сайрагүл Сауытбай Швецияға көшіп кетті. Бұл туралы оның адвокаты Айман Омарова хабарлайды.

«Қош бол, Сайрагул! Жолың болсын! Бақытты бол!
Атажұртың қазақпын деп асығып, Қытайдан қашып келгенде пана бермеседе, енді өміріңе дүниежузінде ең дамыған мемкелет есігін ашты! 
Ұмытпа! Сен әрдайым НАҒЫЗ ҚАЗАҚТЫҢ ҚЫЗЫ екеніңді!!!» деп жазады адвокат өзінің фейсбуктегі парақшасында.

Айман Омарова Азаттыққа «Біз бұған дейін үшінші елден көмек сұрайтынымызды айтқан едік қой. Негізі БҰҰ сот өтпей ешқашан рұқсат етпейтін. Заңда да солай. Бірақ мен АҚШ-қа өтініш жасадым. БҰҰ-на барлық мән-жайды жеткіздік. Ұйымның босқындар жөніндегі комиссариаты Сайрагүлге ерекше жағдай жасады, Швеция өздеріне қабылдайтынын айтып, келуіне рұқсат берді», – деп хабарлаған.

2018 жылы Алматы облысы Панфилов аудандық соты тамыз айында «Қытайдан Қазақстанға шекараны заңсыз кесіп өтті» деп айыпталған Қытай қазағы Сайрагүл Сауытбайды алты айға бас бостандығынан айыруға үкім етіп, бірақ жазасын «жеңілдететін ерекше жағдайына» байланысты шартты жазаға алмастырған. Осылайша сот Сайрагүл Сауытбайды Қытайға депортацияламай, Қазақстанда қалдырған.

Сайрагүл Сауытбайдың босқын мәртебесін беруді сұраған арызын қараған Алматы облыстық полиция департаментінің жанынан құрылған «босқын мәртебесін беру» жөніндегі комиссия оның өтінішін қанағаттандырудан бас тартқан еді. Кейін Сайрагүл аталған комиссияның шешімін заңсыз деп тану туралы талап арыз берді. Талап арыз бойынша сот әлі жалғасып жатыр.