Ресей астанасы Мәскеу қаласындағы Шеремметьево әуежайында ұшақтан шыққан өрттен 41 адам қаза тапты. Бұл туралы РФ ТК Мәскеу өңіраралық тергеу басқармасы басшысының аға көмекшісі Елена Марковская хабарлады деп жазады жергілікті БАҚ.

Ұшақ «Аэрофлот» компаниясының Sukhoi Superjet 100 моделі. Лайнер Мәскеуден Мурманск қаласына аттанған. Алайда 28 минут ұшқаннан кейін экипаж шұғыл түрде Мәскеу әуежайына қайта қонуға мәжбүр болған. Ұшақ ауа райының қолайсыздығына байланысты әуежайға әрең қонған. Дұрыс қонбаудан әуе көлігінің тірегі сынып, қозғалтқышы жана бастаған. Сосын, өрт дереу ұшақтың артқы бөлігін жалмап кеткен.

Апаттан 33 жолаушы аман қалған және төрт экипаж мүшесі, алты адамды ауруханаға жеткізген, олардың үшеуінің жағдайы мүшкіл.

Мурманск облысының губернаторы Андрей Чибис аймақта үш күндік қаралы күн жариялап, қаза тапқандар мен зардап шеккендерге қаржылай көмек көрсетілетіндігін айтты.