Бас прокуратура митинг ұйымдастырып, оған қатысу заңсыз екенін ескертіп, азаматтарды 9-10 маусым күндері рұқсат етілмеген акциялардан бас тартуға шақырды.

Митинг ұйымдастыру — заңмен реттеледі

Бас прокурордың орынбасары Б.Дембаевтың мәлімдемесіне сәйкес, әлеуметтік желілерде рұқсат етілмеген митингтерге шақыру жарияланып жатыр. Бұл әрекеттер «Қазақстан Республикасында бейбіт жиналыстар туралы» заңмен нақты реттеледі.

«Жиналыстар тек жергілікті атқарушы органдардың рұқсатымен, арнайы орындарда, қоғамдық тыныштықты бұзбай өткізілуі тиіс», – делінген ресми үндеуде.

Заң бұзғандар жауапқа тартылады

Рұқсатсыз митингке шақырғаны немесе қатысқаны үшін ӘҚБтК-нің 488-бабы бойынша әкімшілік жауапкершілік қарастырылған. Егер бұл әрекет елеулі зиян келтірсе, онда Қылмыстық кодекстің 400-бабы бойынша іс қозғалады.

Прокуратура халықты сабыр сақтауға шақырады

Бас прокуратура азаматтарды:

• Заң талаптарын мүлтіксіз орындауға,

• Арандатушылыққа ермеуге,

• Рұқсат етілмеген митингілерден бас тартуға шақырды.

Сайлау күні — 9 маусым, осыған байланысты құқық қорғау органдары қоғамдық тәртіпті күшейтеді.