Спортшы Денис Тенді өлтіргендердің адвокаты іс құрамын қайта қарау жөнінде өтініш хат жолдаған. Бұл туралы Жоғарғы соттың баспасөз қызметі хабарлады.

Бірінші сатыдағы соттың 2019 жылғы 17 қаңтардағы үкімімен А.Б.Құдайбергенов пен Н.Д.Қиясов алдын-ала сөз байласып, жәбірленуші Д.Теннің мүлкін жымқырғаны, ұрлық жасағаны, сондай-ақ, оны қасақана өлтіргені үшін кінәлі деп танылып, әрқайсысы 18 жылға бас бостандығынан айыруға сотталған болатын (ҚК-нің 192-бабы 2-бөлігінің 1), 4) тармақтары, ҚК-нің 188-бабы 2-бөлігінің 2) тармағы, ҚК-нің 99-бабы 2-бөлігінің 7), 8) тармақтары).

Апелляциялық сот бұл үкімді заңды күшінде қалдырған.

«Жоғарғы Сот 2024 жылғы 10 қазанда аталған сот актілерінің заңдылығын және негізділігін тексерді, оның қорытындысында оларды қайта қарауға негіздердің болмауына байланысты сотталғандардың адвокаты келтірген өтінішхатты кассациялық сатыдағы сот отырысының қарауына беруден бас тартылды», – делінген хабарламада.

Адвокат өтініш хатында сотталғандарды ақтауды немесе олардың адамды өлтіру деп сараланған әрекеттерін  (ҚК-нің 99-бабынан), абайсызда жәбірленушінің өліміне әкеп соққан денсаулыққа қасақана ауыр зиян келтірген әрекет ретінде ҚК-нің 106-бабының 3-бөлігімен қайта саралауды сұраған.

Фото: РИА Новости