Азат Перуашев қазақстандық шенеуніктерге шүйлікті. Мәжіліс депутаты мемлекеттік кәсіпорын менеджерлерінің фитнесі мен санаторийі де бюджеттің ақшасынан төленетінін жеткізді.
Келтірілген деректерге сүйенсек, ұлттық компанияларда осы мақсатта 40 миллион теңге жұмсаған. Перуашев халықтың ақшасына демалатын менеджерлерді сынады
«Ұлттық компаниялардың бюджеті ашық болған жағдайда, мысалы, жұмысы өнімді болмай, пандемия кезінде дәрі-дәрмектің жетіспеушілігінен адамдардың өліміне әкеліп соққан «СК Фармация» басшылығы өзіне ондаған миллион теңге сыйақы жазбас еді.
Немесе тағы бір мысал, мемлекеттік кәсіпорынның бірі менеджерлерінің фитнеске, спа-салонға баруы үшін салық төлеушілердің қалтасынан 40 млн теңге төлемес еді. Бұл жай ғана жария болған фактілер», – дейді мәжіліс депутаты Азат Перуашев.
Тендер мәселесін реттейтін құжатты бірінші оқылымда мақұлдаған депутаттар квазимемлекеттік сектордағы былықтар жойылып, жағдайдың өзгеретініне сенімді.
