Прокурорлар тексеріс жүргізу барысында жергілікті атқарушы органдармен жетім балалар мен ата-анасының қамқорлығынсыз қалған балалардың құқықтарының өрескел бұзылғанын анықтаған.
Ғ.Мүсірепов ауданы әкімдігінің лауазымды тұлғалары «Тұрғын үй қатынастары туралы» Қазақстан Республикасы Заңының (бұдан әрі – Заң) талаптарын бұза отырып, тұрғын үйге 2010 жылдан бері кезекте тұрған 43 жетім баланы тұрғын үй кезегінен негізсіз алып тастаған.
Тағы бір жағдайда, Заңның 71-бабының талаптарына қайшы, Ақжар ауданы мен Петропавл қаласының қорғаншылық және қамқоршылық органдары 3 ай бойы 6 жетім баланы тұрғын үй кезегіне қою шараларын қолданбаған.
«Айыртау, Ақжар, Аққайың, Ғ.Мүсірепов, Қызылжар, М.Жұмабаев, Мамлют, Тайынша аудандары мен Петропавл қаласының қамқоршылары «Неке (ерлі-зайыптылық) және отбасы туралы» Қазақстан Республикасы Кодексінің 126-бабын бұза отырып, жүйелі негізде қамқорлығындағылардың тәрбиесі мен ұстау туралы есеп бермеген. Қызылжар, Ғ.Мүсірепов, Тимирязев аудандарының қорғаншылық және қамқоршылық органдары кәмелетке толмағандардың пайдасына заңды өкілдерден алименттерді мәжбүрлеп өндіріп алуды бақылау шараларын қабылдамаған», – делінген хабарламада.
Қадағалау органының актілері бойынша 8 лауазымды тұлға, оның ішінде аудандық білім бөлімінің 2 басшысы тәртіптік жауапкершілікке тартылып, заң бұзушылықтар жойылды.
Жүргізілген жұмыстардың нәтижесінде жетім балалар мен ата-анасының қамқорлығынсыз қалған балалардың құқықтарын қорғауға мүмкіндік туды.
Кәмелетке толмағандардың құқықтарын қорғау мәселесі облыс прокуратурасының ерекше бақылауында.
