Бұлай деуімізге Қазақстан президентінің бүгінгі Ресейдің «Известия» газетіне берген сұқбаты дәлел деуге болады.

Ол журналистің «орыс тілін дамыту туралы бастамасына» орай қойған сауалына жауап бере отырып:

Ортақ мәдени-гуманитарлық кеңістік Тәуелсіз Мемлекеттер Достастығын біріктіруші маңызды фактор болған әрі алдағы уақытта да солай қала береді. Бұл бағыттағы өзара тиімді ынтымақтастығымыздың табысты болуына бірден-бір себеп – ТМД елдері халықтарының тілдері мен орыс тілінің үйлесімді әрі теңгерімді дамуы. Бүгінде БҰҰ-ның ресми тілдерінің бірі саналатын әрі халықаралық тіл мәртебесіне ие орыс тілі – мемлекеттеріміз арасындағы достық қарым-қатынасқа демеу болатын ұйыстырушы фактор. Сондай-ақ өңірлік кооперацияны, ынтымақтастық пен өзара сенімді нығайтатын  пәрменді құрал рөлін атқарып отырғаны жасырын емес. Мұны ешкім жоққа шығара алмайды деп ойлаймын – дейді Тоқаев.

Сонымен қатар ол, бір нәрсеге баса назар аударуды сұрайды.

Орыс тілі жөніндегі халықаралық ұйым құру туралы бастама көтерген кезде мен әлемдік тәжірибені де басшылыққа алдым. Кезінде француз, неміс, испан және басқа да тілдерді дамыту үшін осындай халықаралық ұйымдар құрылған. Мына нәрсеге баса назар аударғым келеді. Орыс тіліне қатысты халықаралық ұйым құру идеясы ТМД елдерінің, соның ішінде Қазақстанның мемлекеттік тіл саясатына балама жасау ниетінен  туған жоқ.  Ұйымның құқықтық субъект ретінде танылуы және оған ТМД-ға мүше емес өзге мемлекеттердің қосылуына ашық болуы маңызды – деді ол.

Сондай-ақ ол, биыл ТМД аумағында Орыс тілі жылы болып жарияланғанын айта келіп, «мұның символдық мәні зор» екенін атап өтті.

Санкт-Петербург Достастық елдерінің 2023 жылғы мәдени астанасы болды. Ол ТМД елдері арасындағы мәдени байланыстардың нығаюына зор үлес қосты. Бұл ретте екіжақты мәдени-гуманитарлық қарым-қатынастар Қазақстан мен Ресей арасындағы ынтымақтастықтың маңызды  бағыты болып қала береді – деді Тоқаев.

Дәл осы кезде елімізде тіл мәселесі ушығып тұр. Қазақстанда қазақ тілі дамуы әлі кешеуілдеп, қос тіл саясаты жүріп жатыр. Елдегі қазақ ұлтының үлесі 70 пайыздан асса да, Үкімет тіл мәселесін шешуге құлықсыздық танытып отыр. Соған қарамастан мемлекеттік тілдің мәртебесін көтереді деген президентіміз орыс тілінің жыртысын жыртуын қояр емес…

Arasha.kz

ФОТО: Ақорда